ഐസിസി ചാമ്പ്യന്‍സ് ട്രോഫി 2025 ഒരു ഹൈബ്രിഡ് മോഡലില്‍ നടക്കുമെന്ന് വെളിപ്പെടുത്തി പാകിസ്ഥാന് മുന്‍ ക്യാപ്റ്റന്‍ റാഷിദ് ലത്തീഫ്. ഇന്ത്യന്‍ ക്രിക്കറ്റ് കണ്‍ട്രോള്‍ ബോര്‍ഡ് (ബിസിസിഐ), പാകിസ്ഥാന് ക്രിക്കറ്റ് ബോര്‍ഡ് (പിസിബി), ഇന്റര്‍നാഷണല്‍ ക്രിക്കറ്റ് കൗണ്‍സില്‍ (ഐസിസി) എന്നിവ തമ്മില്‍ ഇക്കാര്യത്തില്‍ ധാരണയിലെത്തിയതായി അദ്ദേഹം അവകാശപ്പെട്ടു. ഇന്ത്യ അവരുടെ മത്സരങ്ങള്‍ക്കായി പാകിസ്ഥാനിലേക്ക് പോകില്ല. പകരം ഇന്ത്യ തങ്ങളുടെ മത്സരങ്ങള്‍ ദുബായില്‍ കളിക്കും.
അന്താരാഷ്ട്ര ക്രിക്കറ്റിന്റെ പരമോന്നത ബോഡിയും രണ്ട് ബോര്‍ഡുകളും ഒരു ഹൈബ്രിഡ് മോഡലുമായി മുന്നോട്ട് പോകാന്‍ സമ്മതിച്ചിട്ടുണ്ട്. പിസിബി ഹോസ്റ്റിംഗ് അവകാശങ്ങളില്‍ നിന്ന് നീക്കം ചെയ്യില്ല, പക്ഷേ ഇന്ത്യ അവരുടെ ഗെയിമുകള്‍ മറ്റൊരു രാജ്യത്ത് കളിക്കും. ഇന്ത്യ നോക്കൗട്ട് ഘട്ടത്തില്‍ എത്തിയാല്‍ ഒരു സെമിഫൈനലും ഫൈനലും പാകിസ്ഥാന് പുറത്ത് നടക്കും- ലത്തീഫ് പറഞ്ഞു.
എട്ട് ടീമുകളുടെ ടൂര്‍ണമെന്റ് അടുത്ത വര്‍ഷം ഫെബ്രുവരി-മാര്‍ച്ച് മാസങ്ങളില്‍ ഷെഡ്യൂള്‍ ചെയ്തിട്ടുണ്ട്, എന്നാല്‍ സുരക്ഷാ പ്രശ്നങ്ങള്‍ കാരണം ഇന്ത്യന്‍ സര്‍ക്കാര്‍ എന്‍ഒസി നല്‍കാന്‍ വിസമ്മതിച്ചതിനെത്തുടര്‍ന്ന് പാകിസ്ഥാനില്‍ കളിക്കാന്‍ ബിസിസിഐ വിസമ്മതിച്ചു. ആഗോള ഇവന്റിന്റെ ഷെഡ്യൂളും ഫോര്‍മാറ്റും അന്തിമമാക്കാന്‍ ഐസിസിയുടെ ഉദ്യോഗസ്ഥര്‍ വെള്ളിയാഴ്ച യോഗം ചേരും.
ഹോസ്റ്റിംഗ് ഫീസായി ഐസിസി ഏകദേശം 64-65 മില്യണ്‍ ഡോളര്‍ പിസിബിക്ക് നല്‍കും. ഹൈബ്രിഡ് മോഡലിന് സമ്മതിച്ചാല്‍ പാകിസ്ഥാന് കൂടുതല്‍ പണം സമ്പാദിച്ചേക്കാം. പാകിസ്ഥാന് വേണ്ടെന്ന് പറയുമെന്ന് ഞാന്‍ കരുതുന്നില്ല. പിസിബിയും ഐസിസിയും ഉടന്‍ പ്രഖ്യാപനം നടത്തും- ലത്തീഫ് കൂട്ടിച്ചേര്‍ത്തു.
