ഇന്ത്യയുടെ വെറ്ററന് ഓള്റൗണ്ടര് രവിചന്ദ്രന് അശ്വിന് അടുത്തിടെ അന്താരാഷ്ട്ര ക്രിക്കറ്റില്നിന്ന് വിരമിക്കല് പ്രഖ്യാപിച്ചിരുന്നു. 2024-25 ബ്രിസ്ബേനില് നടന്നുകൊണ്ടിരിക്കുന്ന ബോര്ഡര്-ഗവാസ്കര് ട്രോഫിയുടെ മൂന്നാം ടെസ്റ്റിന്റെ സമാപനത്തിന് ശേഷം അദ്ദേഹം തന്റെ തീരുമാനം അറിയിച്ചത്. അതേസമയം, ഇതിഹാസ താരം കപില് ദേവ് അശ്വിന് വിരമിച്ച രീതിയില് താനിക്കുള്ള അതൃപ്തി പ്രകടിപ്പിച്ചു. താനായിരുന്നെങ്കില് ഏറെ ബഹുമാനത്തോടെയും സന്തോഷത്തോടെയും അശ്വിനെ യാത്രയയക്കുമായിരുന്നെന്ന് അഭിപ്രായപ്പെട്ടു.
അശ്വിനെ ഇങ്ങനെയായിരുന്നില്ല യാത്രയാക്കേണ്ടിയിരുന്നത്. ഹോം ഗ്രൗണ്ടില്വെച്ച് വിരമിക്കാന് അശ്വിന് അസവരം നല്കണമായിരുന്നു. അശ്വിന്റെ വിരമിക്കല് പ്രഖ്യാപിച്ച രീതികണ്ട് ഞാന് ഞെട്ടിപ്പോയി. ഇന്ത്യ കണ്ട ഏറ്റവും വലിയ മാച്ച് വിന്നര് ഇങ്ങനെയായിരുന്നില്ല പോകേണ്ടിയിരുന്നത്. അതില് ആരാധകരും കടുത്ത നിരാശയിലാണ്. മുറിവേറ്റവന്റെ വേദന അശ്വിന്റെ മുഖത്ത് കാണാമായിരുന്നു. അശ്വിന് തീര്ത്തും അസംതൃപ്തനായിരുന്നു. അതെന്നെ ശരിക്കും വേദനിപ്പിച്ചു. കാരണം, അശ്വിന് ഇതിലും വലിയ യാത്രയയപ്പ് അര്ഹിച്ചിരുന്നു.
അശ്വിന് എന്തുകൊണ്ടാണ് ഇത്രയും വേഗം വിരമിക്കാന് തീരുമാനിച്ചത് എന്ന് എനിക്ക് വ്യക്തമായി അറിയില്ല. ഹോം ഗ്രൗണ്ടില് വിരമിക്കല് പ്രഖ്യാപിക്കാനായി അവന് കാത്തിരിക്കാമായിരുന്നു. എന്തുകൊണ്ട് ഇത്രവേഗം വിരമിക്കല് പ്രഖ്യാപിച്ചു എന്ന കാര്യത്തില് അശ്വിന് പറയാനുള്ളത് കൂടി കേള്ക്കാന് എനിക്കാഗ്രഹമുണ്ട്.
106 ടെസ്റ്റുകള് കളിച്ച അശ്വിന് ഇന്ത്യന് ക്രിക്കറ്റിന് നല്കിയ സംഭാനകള് കണക്കിലെടുത്താല് മറ്റൊരു താരത്തിനും അതിന് അടുത്തെത്താന് കഴിയില്ല. അതുകൊണ്ട് തന്നെ ആ ബഹുമാനം അയാള് അര്ഹിക്കുന്നു. ഇന്ത്യയുടെ എക്കാലത്തെയും വലിയ മാച്ച് വിന്നര്ക്ക് ബിസിസിഐ അശ്വിന് ഉചിതമായ യാത്രയയപ്പ് ഒരുക്കുമെന്നാണ് ഞാന് കരുതുന്നത്.
ന്യൂബോളിലും ഓള്ഡ് ബോളിലും പന്തെറിയാന് കഴിവുള്ള അപൂര്വം ബൗളര്മാരിലൊരാളാണ് അശ്വിന്. അവന് ടീമിലുള്ളപ്പോള് ടീമിലില്ലാതിരുന്നത് ഭാഗ്യമായാണ് കരുതുന്നത്. കാരണം അവനുണ്ടായിരുന്നെങ്കില് എനിക്ക് ടീമില് ഇടം കിട്ടില്ലായിരുന്നു- കപില് കൂട്ടിച്ചേര്ത്തു.
