കൊച്ചി: ലൈംഗിക ആരോപണത്തെ തുടർന്ന് ‘അമ്മ’ ജനറൽ സെക്രട്ടറി സ്ഥാനത്തു നിന്ന് രാജിവെച്ച സിദ്ദിഖിന്‍റെ പകരക്കാൻ ആരാകുമെന്ന ചർച്ചകൾ സജീവം. ചലച്ചിത്ര താരങ്ങളുടെ സംഘടനയെ നയിക്കാൻ വനിതാ അംഗമെത്തുമോയെന്നാണ് എല്ലാവരും ഉറ്റുനോക്കുന്നത്. സംഘടനയുടെ നിര്‍ണായക എക്സിക്യൂട്ടീവ് യോഗം ഈ ആഴ്ച തന്നെ കൊച്ചിയിൽ ചേരും. ഈ യോഗത്തിൽ പകരക്കാരെ തെരഞ്ഞെടുക്കേണ്ടതിൽ ധാരണയായേക്കുമെന്നാണ് റിപ്പോർട്ടുകൾ. നാളെ യോഗം നടന്നേക്കുമെന്ന് വാർത്തകൾ ഉണ്ടായിരുന്നെങ്കിലും, താരങ്ങളുടെ അസൗകര്യത്തെത്തുടർന്ന് മാറ്റുകയായിരുന്നു.
സിദ്ദിഖ് രാജിവെച്ചതോടെ ജോയിൻ സെക്രട്ടറി ബാബു രാജിനാണ് താൽക്കാലിക ചുമതല നൽകിയിരിക്കുന്നത്. 506 അംഗങ്ങളുള്ള സംഘടനയുടെ ജനറൽ സെക്രട്ടറി തന്നെ ആരോപണത്തിൽപ്പെട്ടതോടെ അനിശ്ചിതത്വം ആരംഭിച്ചിട്ടുണ്ട്. സർക്കാർ അന്വേഷണം പ്രഖ്യാപിച്ചതോടെ നിയമ വഴിയിൽ നീങ്ങുക എന്ന മാർഗം മാത്രമേ സംഘടനയുടെ മുന്നിലുമുള്ളൂ.
ഹേമ കമ്മിറ്റി റിപ്പോർട്ട് പുറത്തുവന്നതോടെ തന്നെ അമ്മ സംഘടനയിലെ അംഗങ്ങൾ തമ്മിലുള്ള ഭിന്നത പുറത്തുവന്നിരുന്നു. സിദ്ദിഖിന്‍റെ വാദങ്ങളെ തള്ളിയും, തള്ളിയില്ലെങ്കിലും നിലപാട് കടുപ്പിച്ചും കൂടുതൽ അംഗങ്ങൾ രംഗത്ത് വന്നിരുന്നു. ജയൻ ചേർത്തല, ജഗദീഷ് തുടങ്ങിയവർ സംഘടനയുടെ മൗനത്തെ ചോദ്യം ചെയ്തിരുന്നു. വിഷയത്തിൽ സിദ്ദിഖ് പ്രതികരണം രേഖപ്പെടുത്തിയതിന് പിന്നാലെയാണ് അദ്ദേഹത്തിനെതിരെയും ആരോപണം വന്നത്.
അൻസിബ ഹസൻ, ഉർവശി, ശ്വേത മേനോൻ തുടങ്ങിയവരെല്ലാം അഭിനേത്രികൾക്ക് നേരിടേണ്ടിവരുന്ന ദുരനുഭവം വിവരിച്ച് രംഗത്തെത്തിയിരുന്നു. ഈ ആഴ്ച ചേരുന്ന സംഘടനയുടെ എക്സിക്യുട്ടീവ് യോഗത്തിലാകും പുതിയ സെക്രട്ടറി തെരഞ്ഞെടുപ്പും മറ്റുവിഷയങ്ങളും ചർച്ചയാവുക. ജനറൽ ബോഡി യോഗം വിളിക്കണമെന്ന ആവശ്യവും ഉയർന്നിട്ടുണ്ട്.
ഹേമ കമ്മിറ്റി റിപ്പോർട്ട് ചർച്ചയാകുന്ന വേളയിൽ ഒരു വനിതാ അംഗത്തെ അമ്മ ജനറൽ സെക്രട്ടറിയാക്കുമോയെന്ന ചോദ്യം ഉയരുന്നുണ്ട്. ഇതിന് സാധ്യത വിരളമാണെന്നാണ് സിനിമാ മേഖലയിലുള്ളവർ തന്നെ പറയുന്നത്. ഹേമ കമ്മിറ്റി വിഷയത്തിൽ ശക്തമായ നിലപാട് സ്വീകരിച്ച ജഗദീഷ് സെക്രട്ടറിയായി എത്തുമെന്ന അഭ്യൂഹങ്ങളും ഉണ്ട്.
വിവാദങ്ങളുടെ പശ്ചാത്തലത്തിൽ ആരോപണങ്ങളുടെ കരിനിഴൽ പതിക്കാത്ത വ്യക്തിയെ സെക്രട്ടറിയാക്കുക എന്ന വഴി മാത്രമേ സംഘടനയുടെ മുന്നിലുള്ളൂ. വെല്ലുവിളി നിറഞ്ഞഘട്ടത്തിൽ സ്ഥാനം ഏറ്റെടുക്കാൻ ആര് തയ്യാറാകുമെന്നും കാത്തിരുന്നു കാണേണ്ടതുണ്ട്.
സിനിമാരംഗത്തെ നിരവധി സ്ത്രീകൾ ലൈംഗിക പീഡന ആരോപണങ്ങളുമായി രംഗത്തുവന്ന പശ്ചാത്തലത്തിൽ സർക്കാർ അന്വേഷണത്തിന് ഉത്തരവിട്ടിട്ടുണ്ട്. ഐജി സ്പർജൻകുമാറിന്‍റെ നേതൃത്വത്തിലാണ് പ്രത്യേക അന്വേഷണസംഘം രൂപീകരിക്കുന്നത്. നാല് ഉന്നത വനിതാ പോലീസ് ഉദ്യോഗസ്ഥർ ഉൾപ്പെട്ടതാണ് സംഘം.
