ന്യൂഡൽഹി: കോടികളുടെ വരുമാനമാണ് രാജ്യത്തെ ഓരോ ടോൾ പ്ലാസയ്ക്കുമുള്ളത്. ടോളില്ലാത്ത ഒരു ജീവിതം ഇനി ഇന്ത്യാക്കാർക്കില്ല. റോഡുകൾ കൂടുതൽ മെച്ചപ്പെടുന്നു എന്നതിനർത്ഥം കൂടുതൽ ടോൾ പിരിവുകൾ വരുന്നു എന്നു കൂടിയാണ്. ഇന്ത്യയിൽ ഏറ്റവും കൂടുതല്‍ ടോൾ പിരിക്കുന്ന ടോൾ പ്ലാസ ഗുജറാത്തിലാണ് സ്ഥിതി ചെയ്യുന്നത്. വഡോദരയിൽ നിന്ന് ബറൂച്ച് വരെ നീളുന്ന പാതയുടെ ഭർതാന ടോൾ പ്ലാസയിലാണ് ഇന്ത്യയിൽ ഏറ്റവും കൂടുതൽ ടോൾ പിരിവ് നടക്കുന്നത് അഞ്ച് വർഷത്തിനിടയിൽ 2,043.8 കോടി രൂപ ഈ ടോൾ പ്ലാസ പിരിച്ചെടുത്തു. 158 കിലോമീറ്റർ ദൈർഘ്യമാണ് ഈ പാതയ്ക്കുള്ളത്. 2023-24 കാലത്ത് മാത്രം 472.7 കോടി രൂപയാണ് ഈ ടോൾ പ്ലാസയുടെ വരുമാനം.
ടോൾ കളക്ഷന്റെ കാര്യത്തിൽ രണ്ടാംസ്ഥാനത്ത് നിൽക്കുന്നത് ഷാജഹാൻപുർ ടോൾ പ്ലാസയാണ്. 115 കിലോമീറ്റർ ദൈർഘ്യമുള്ള ഈ സ്ട്രെച്ച് രാജസ്ഥാനിലെ ദേശീയപാത 8ൽ ആണ് സ്ഥിതി ചെയ്യുന്നത്. 2023-24 കാലത്ത് മാത്രം 429.7 കോടി രൂപ ഈ ടോൾ പ്ലാസയിൽ വരുമാനമുണ്ടായി. 5 വർഷത്തെ വരുമാനം 1,884.5 കോടി രൂപയാണ്.
ടോൾ പിരിവിൽ മൂന്നാമത് വരുന്നത് പശ്ചിമബംഗാളിലെ ജലാധുലാഗോരി ടോൾ പ്ലാസയാണ്. 35 കിലോമീറ്റർ വരുന്ന ഈ സ്ട്രെച്ച് ദേശീയപാച 16ലാണ് സ്ഥിതി ചെയ്യുന്നത്. അഞ്ച് വർഷത്തിനിടയിൽ ഇവർ 1,538.9 കോടി രൂപ പിരിച്ചെടുത്തു.
ഉത്തർപ്രദേശിലാണ് ടോൾ പിരിവിൽ നാലാമത് നിൽക്കുന്ന പാതയുള്ളത്. എൻഎച്ച് 19ന്റെ ഇറ്റാവ-ചകേരി സ്ട്രെച്ചിൽ വരുന്ന ഈ ടോൾ പ്ലാസ അഞ്ച് വർഷത്തിനിടയിൽ 1,480.7 കോടി രൂപയാണ് ടോളായി പിരിച്ചത്.
ടോൾ പിരിവിന്റെ കാര്യത്തിൽ അഞ്ചാമത് വരുന്ന പാത ഹരിയാനയിലാണ് സ്ഥിതി ചെയ്യുന്നത്. ഇവിടുത്തെ ഘരുണ്ട ടോൾ പ്ലാസ 1,314.4 കോടി രൂപ പിരിച്ചെടുത്തു. ആറാംസ്ഥാനത്ത് വരുന്ന ഗുജറാത്തിലെ ചോര്യാസി ടോൾ പ്ലാസ അഞ്ച് വർഷത്തിനിടയിൽ പിരിച്ചെടുത്തത് 1,272.6 കോടി രൂപയാണ്. 2023-24 കാലത്ത് മാത്രം 354.9 കോടി രൂപയുടെ വരുനമാനം ഈ ടോൾ ബൂത്തിലുണ്ടായി. ദേശീയപാത എട്ടിലെ 246 കിലോമീറ്റർ വരുന്ന ഈ സ്ട്രെച്ച് ബറൂച്ചിനെയും സൂറത്തിനെയും ബന്ധിപ്പിക്കുന്നു.
രാജസ്ഥാനിലെ തിക്കാരിയ – കൃഷ്ണഗഢ് പാതയിലെ ട്രോൾ പ്ലാസയാണ് ടോൾ പിരിവിൽ ഏഴാംസ്ഥാനത്ത് വരുന്നത്. ഈ പാതയിൽ അഞ്ച് വർഷത്തിനിടെ 1,161.2 കോടി രൂപയുടെ പിരിവുണ്ടായി. തമിഴ്നാട്ടിലെ കൃഷ്ണഗിരിയും തുമ്പിപ്പാടിയും തമ്മിൽ ബന്ധിപ്പിക്കുന്ന എൻഎച്ച് 44ലെ ടോൾ പ്ലാസയാണ് ടോൾ കളക്ഷനിൽ എട്ടാംസ്ഥാനത്ത് എത്തിയിരിക്കുന്നത്. ഇവിടെ കഴിഞ്ഞ അഞ്ച് വർഷം പിരിച്ചത്.
ടോൾ പിരിവിന്റെ കാര്യത്തിൽ ഒമ്പതാം സ്ഥാനത്ത് നിൽക്കുന്നത് നവാബ്ഗഞ്ജ് ടോൾ പ്ലാസയാണ്. അഞ്ച് വർഷം കൊണ്ട് ഈ ടോൾ പ്ലാസ പിരിച്ചത് 1,096.9 കോടി രൂപയാണ്. ദേശീയപാത 25ൽ കാൺപുർ – അയോധ്യാ സ്ട്രെച്ചിലാണ് ഈ ടോൾ പ്ലാസ സ്ഥിതി ചെയ്യുന്നത്.
ടോൾ പിരിവിൽ പത്താംസ്ഥാനത്തുള്ളത് ബിഹാറിലെ സാസാറാം ടോൾ പ്ലാസയിലാണ്. അഞ്ച് വർഷത്തിനിടയിൽ ഇവിടെ പിരിച്ചത് 1,071.4 കോടി രൂപയാണ്. ദേശീയപാത 2ൽ വാരാണസി-ഔറംഗബാദ് റൂട്ടിലാണ് ഈ ടോൾ പ്ലാസ ഉള്ളത്.
