പത്തനംതിട്ട: സംസ്ഥാന സർക്കാരിന്റെ സ്വപ്ന പദ്ധതിയായ ശബരിമല വിമാനത്താവളം കടമ്പകളോരോന്നും കടന്ന് മുന്നോട്ട്. കേന്ദ്രസർക്കാരിൻ്റെ പിഎം ഗതിശക്തി പദ്ധതിയിൽ ഇടംപിടിച്ചതോടെ പദ്ധതിക്ക് വേഗം കൂടുമെന്നാണ് പ്രതീക്ഷ. ശബരിമല വിമാനത്താവള പദ്ധതിയുടെ നടത്തിപ്പുകാരായ കേരള സ്റ്റേറ്റ് ഇൻഡസ്ട്രിയൽ ഡവലപ്മെൻ്റ് കോർപറേഷൻ (കെഎസ്ഐഡിസി) സമർപ്പിച്ച റിപ്പോർട്ടിന് അംഗീകാരം നൽകിയാണ് പിഎം ഗതിശക്തിയിൽ ഉൾപ്പെടുത്തിയത്. രാജ്യത്തെ വിവിധ അടിസ്ഥാന സൗകര്യ പദ്ധതികളെ ഏകോപിപ്പിച്ച്, അവയുടെ സംയോജിത വികസനം ഉറപ്പാക്കുകയാണ് പിഎം ഗതിശക്തി പദ്ധതിയിലൂടെ കേന്ദ്രസർക്കാർ ഉദ്ദേശിക്കുന്നത്.
നേരത്തെ കേന്ദ്ര പ്രതിരോധ മന്ത്രാലയം ശബരിമല വിമാനത്താവള പദ്ധതിക്ക് അനുമതി നൽകിയിരുന്നു. ഇനി ഡയറക്ടർ ജനറൽ ഓഫ് സിവിൽ ഏവിയേഷൻ്റെ (ഡിജിസിഎ) അംഗീകാരം കൂടി ലഭ്യമാകുന്നതോടെ ശബരിമല വിമാനത്താവളത്തിനു കേന്ദ്രതലത്തിൽ നിന്നുള്ള അനുമതികൾ ഏതാണ്ട് പൂർണമാകും. അതേസമയം സംസ്ഥാന സർക്കാർ വിജ്ഞാപനവും നടപടിക്രമങ്ങളും പൂർത്തിയാക്കുന്ന മുറയ്ക്കാകും ഡിജിസിഎ ശബരിമല വിമാനത്താവളത്തിന് പച്ചക്കൊടി വീശുക. പദ്ധതിക്കായി പുറപ്പെടുവിച്ച സ്ഥലമേറ്റെടുപ്പ് സംബന്ധിച്ച വിജ്ഞാപനം ഹൈക്കോടതി സ്റ്റേ ചെയ്ത സാഹചര്യത്തിൽ ഒന്നിൽനിന്ന് നടപടിക്രമങ്ങൾ തുടങ്ങേണ്ട സാഹചര്യമാണ് സംസ്ഥാന സർക്കാരിന് മുന്നിലുള്ളത്.
2023 മാർച്ചിലാണ് 1000.28 ഹെക്ടർ ഭൂമി ഏറ്റെടുക്കാനായി സംസ്ഥാന സർക്കാർ വിജ്ഞാപനം പുറപ്പെടുവിച്ചത്. എന്നാൽ സാമൂഹികാഘാത പഠനം നടത്തിയതും ഭൂമിയുടെ ഉടമസ്ഥാവകാശം നിർണയിച്ചതും ചട്ടവിരുദ്ധമാണെന്ന് ആരോപിച്ച് ബിലീവേഴ്സ് ചർച്ചിന് കീഴിലുള്ള അയന ചാരിറ്റബിൾ ട്രസ്റ്റ് ഹൈക്കോടതിയിൽ ഹർജി സമർപ്പിക്കുകയായിരുന്നു. ബിലീവേഴ്സ് ചർച്ചിന് കീഴിലുള്ള ചെറുവള്ളി എസ്റ്റേറ്റിലെ ഭൂമിയുടെ ഉടമസ്ഥാവകാശം ആർക്കാണെന്ന കാര്യത്തിൽ തർക്കം നിലനിൽക്കുന്ന സാഹചര്യത്തിൽ സർക്കാരിന് ഉടമസ്ഥാവകാശമുള്ള ഭൂമി എന്ന പേരിലാണ് വിജ്ഞാപനം പുറപ്പെടുവിച്ചതെന്നായിരുന്നു ഹർജിക്കാർ ഉന്നയിച്ചത്. കൂടാതെ, സാമൂഹികാഘാതം നടത്തിയ സെൻ്റർ ഫോർ മാനേജ്മെൻ്റ് ഡവലപ്മെൻ്റ്, സർക്കാരിന് കീഴിലുള്ള ഏജൻസിയാണെന്നും ഇത് ചട്ടവിരുദ്ധമാണെന്നും ഹർജിയിൽ ചൂണ്ടിക്കാട്ടി.
ഹർജി അംഗീകരിച്ച കോടതി ഭൂമിയേറ്റെടുപ്പിനുള്ള വിജ്ഞാപനം സ്റ്റേ ചെയ്യുകയായിരുന്നു. പിന്നീട്, വിജ്ഞാപനം പിൻവലിക്കാമെന്ന കാര്യം സംസ്ഥാന സർക്കാർ ഹൈക്കോടതിയെ അറിയിച്ചു. ഇതോടെ പുതിയ വിജ്ഞാപനം പുറപ്പെടുവിക്കാനുള്ള വഴിയൊരുങ്ങി. സാമൂഹികാഘാത പഠനം സ്വതന്ത്ര ഏജൻസിയെ വെച്ചു നടത്തേണ്ട സാഹചര്യവുമാണ് സർക്കാരിന് മുന്നിലുള്ളത്. ഏജൻസിയെ കണ്ടെത്താനുള്ള നടപടികൾ സർക്കാർ തലത്തിൽ പുരോഗമിക്കുകയാണ്. ഭൂമിയേറ്റെടുപ്പിനുള്ള പ്രാഥമിക വിജ്ഞാപനം പുറപ്പെടുവിക്കാനുള്ള നടപടികൾ അന്തിമഘട്ടത്തിൽ എത്തി. ഇതിനൊപ്പം പദ്ധതിയുടെ വിശദ പദ്ധതിരേഖയും (ഡിപിആർ) പുറത്തിറക്കും.
256.59 ഏക്കർ ഭൂമിയിൽ 3973 കോടി രൂപ ചെലവിലാണ് ശബരിമല വിമാനത്താവളം ഉയരുക. മൂന്നര കിലോമീറ്റർ നീളവും 45 മീറ്റർ വീതിയുള്ളതാണ് വിമാനത്താവള റൺവേ. ശബരിമല വിമാനത്താവളം യാഥാർഥ്യമാകുന്നതോടെ കേരളത്തിലെ വിമാനത്താവളങ്ങളുടെ എണ്ണം അഞ്ചായി ഉയരും. കോട്ടയം, പത്തനംതിട്ട ജില്ലക്കാർക്കും ശബരിമല തീർഥാടകർക്കും ഏറെ ഉപയോഗപ്രദമാകുന്നതാണ് പദ്ധതി.
