കോഴിക്കോട്: എറണാകുളം – ബെംഗളൂരു വന്ദേ ഭാരത് സ്പെഷ്യലിന് പിന്നാലെ കേരളത്തിലേക്ക് നാലാം വന്ദേ ഭാരത് വരുന്നു. ഗോവയിൽ നിന്നാണ് കേരളത്തിലേക്ക് പുതിയ സെമി ഹൈസ്പീഡ് ട്രെയിൻ സർവീസ് ആരംഭിക്കുന്നത്. നിലവിൽ മഡ്ഗാവ് – മംഗളൂരു റൂട്ടിൽ സർവീസ് നടത്തുന്ന വന്ദേ ഭാരത് എക്സ്പ്രസാണ് കോഴിക്കോടേക്ക് നീട്ടുക. ഓഗസ്റ്റ് മാസത്തോടെ വന്ദേ ഭാരത് സർവീസ് യാഥാർഥ്യമാകുമെന്ന് പി ടി ഉഷ എംപി വ്യക്തമാക്കി.
ഗോവൻ മലയാളി സമൂഹത്തിന്‍റെ ആവശ്യം പരിഗണിച്ചാണ് വന്ദേ ഭാരത് കേരളത്തിലേക്ക് നീട്ടുന്നത്. സർവീസ് നീട്ടുന്നത് കേന്ദ്രത്തിന്‍റെ സജീവ പരിഗണനയിലാണെന്നും ആവശ്യത്തോട് തികച്ചും അനുഭാവപൂര്‍ണമായ നിലപാട് സ്വീകരിക്കുമെന്ന് കേന്ദ്ര റെയില്‍വേ മന്ത്രി അശ്വിനി വൈഷ്ണവ് കൂടിക്കാഴ്ചയില്‍ അറിയിച്ചെന്നും പി ടി ഉഷ എംപി പറഞ്ഞു.
നേരത്തെ തന്നെ ഗോവ വന്ദേ ഭാരത് കോഴിക്കോട്ടേക്ക് നീട്ടുന്നത് കേന്ദ്രത്തിന്‍റെ പരിഗണനയിലുണ്ടായിരുന്നു. രണ്ടാം മോദി സർക്കാരിന്‍റെ അവസാനകാലത്ത് കോഴിക്കോട് എംപി എംകെ രാഘവനോട് റെയിൽവേ മന്ത്രി ഇക്കാര്യം സൂചിപ്പിക്കുകയും ചെയ്തിരുന്നു. പിന്നീട് നീണ്ടുപോയ സർവീസിനാണ് വീണ്ടും പച്ചക്കൊടി വീശിയിരിക്കുന്നത്.
കേരളത്തിന് പുറത്തേക്ക് സർവീസ് നടത്തുന്ന മൂന്നാമത്തെ വന്ദേ ഭാരതെന്ന ഖ്യാതിയോടെയാകും സംസ്ഥാനത്തിന്‍റെ നാലാം വന്ദേ ഭാരത് ട്രാക്കിലെത്തുക. എറണാകുളം – ബെംഗളൂരു വന്ദേ ഭാരത് സ്പെഷ്യൽ ട്രെയിനായാണ് സർവീസ് നടത്തുന്നതെങ്കിൽ മറ്റുരണ്ടും പ്രതിദിന സർവീസ് തന്നെയാണ്. തിരുവനന്തപുരം – മംഗലാപുരം, കാസർകോട് തിരുവനന്തപുരം, വന്ദേ ഭാരതുകളാണ് കേരളത്തിലൂടെ നിലവിൽ സർവീസ് നടത്തുന്നത്.
മംഗലാപുരം – മഡ്ഗാവ് റൂട്ടിൽ വന്ദേ ഭാരത് ആരംഭിച്ച സമയത്ത് തന്നെ ഇത് കേരളത്തിലേക്ക് നീട്ടണമെന്ന ആവശ്യം ഉയർന്നിരുന്നു. എന്നാൽ അന്ന് റെയിൽവേ ബോർഡ് അത് പരിഗണിച്ചില്ല. പിന്നീട് സർവീസിന് പ്രതീക്ഷിച്ച വരുമാനം ലഭിക്കാതെ വന്നതോടെയാണ് കേരളത്തിലേക്ക് നീട്ടാൻ ആലോചന തുടങ്ങിയത്. വടക്കൻ കേരളത്തിന്‍റെ ടൂറിസം രംഗത്തിന് കൂടി കുതിപ്പേകുന്ന റെയിൽ കണക്ടിവിറ്റിയായി ഇത് മാറും.
ഗോവയ്‌ക്കും കര്‍ണാടകയ്‌ക്കുമിടയിലെ റെയില്‍വേ കണക്ടിവിറ്റി ശക്തമാക്കാന്‍ മഡ്ഗാവ് – മംഗലാപുരം സെമി-ഹൈസ്പീഡ് ട്രെയിന്‍ വഴിയൊരുക്കിയിട്ടുണ്ട്. ഇത് കോഴിക്കോടേക്ക് എത്തുന്നതോടെ കണ്ണൂർ, കാസർകോട് ജില്ലകളിലുള്ളവർക്ക് അതിവേഗത്തിൽ മംഗളൂരുവിലേക്ക് എത്തിച്ചേരാനും സാധിക്കും.
