അങ്ങനെ ഗോസിപ്പുകള്‍ക്ക് അവസാനം, നാഗ ചൈതന്യയും ശോഭിത ധൂലിപാലയും വിവാഹിതരാകുന്നു. ഇന്ന് ഹൈദരബാദില്‍ വച്ച് ഇരുവരുടെയും വിവാഹ നിശ്ചയം കഴിഞ്ഞു. ചിത്രങ്ങള്‍ സോഷ്യല്‍ മീഡിയയില്‍ വൈറലാവുന്നു. നാഗ ചൈതന്യയുടെ അച്ഛനും നടനുമായ അക്കിനേനി നാഗാര്‍ജുനയാണ് വിവാഹ നിശ്ചയത്തിന്റെ ചിത്രങ്ങള്‍ സോഷ്യല്‍ മീഡിയയിലൂടെ പങ്കുവച്ചത്.
‘ഇന്ന് രാവിലെ 9.42 ന് ഞങ്ങളുടെ മകന്‍ അക്കിനേനി നാഗ ചൈതന്യയും ശോഭിത ധൂലിപാലയും തമ്മിലുള്ള വിവാഹ നിശ്ചയം കഴിഞ്ഞ വാര്‍ത്ത സന്തോഷത്തോടെ അറിയിക്കുന്നു. ഞങ്ങളുടെ കുടുംബത്തിലേക്ക് ശോഭിതയെ സ്വീകരിക്കുന്നതില്‍ അതിയായ സന്തോഷമുണ്ട്. സന്തോഷകരമായ ദാമ്പത്യത്തിന് രണ്ടുപേര്‍ക്കും അഭിനന്ദനങ്ങള്‍. ഇരുവര്‍ക്കും സ്‌നേഹവും സന്തേഷവും നിറഞ്ഞ ജീവിതം ഉണ്ടാവട്ടെ, ദൈവം അനുഗ്രഹിക്കട്ടെ’ എന്നാണ് അക്കിനേനി നാഗാര്‍ജുന ട്വിറ്ററില്‍ കുറിച്ചത്.
സമാന്ത റുത്ത് പ്രഭവുമായുള്ള വിവാഹ മോചനം കഴിഞ്ഞതുമുതല്‍ നാഗ ചൈതന്യയുടെയും ശോഭിത ധൂലിപാലയുടെയും പ്രണയത്തെ കുറിച്ചുള്ള ഗോസിപ്പുകള്‍ വന്നിരുന്നു. ഇരുവരും ഡേറ്റിങിലാണെന്നും, വിദേശ രാജ്യങ്ങളില്‍ അവധി ആഘോഷിക്കുകയാണ് എന്നുമൊക്കെയുള്ള വാര്‍ത്ത പുറത്തുവന്നിരുന്നു. എന്നാല്‍ അതെല്ലാം കിംവദന്തിയാണെന്ന തരത്തിലാണ് കുടുംബം പ്രതികരിച്ചത്. ഇപ്പോഴിതാ എല്ലാം കിംവദന്തികള്‍ക്കും അവസാനമിട്ടുകൊണ്ട് വിവാഹ നിശ്ചയം കഴിഞ്ഞിരിക്കുന്നു.
സമാന്ത റുത്ത് പ്രഭുവാണ് നാഗ ചൈതന്യയുടെ ആദ്യ ഭാര്യ. ഏഴ് വര്‍ഷത്തെ പ്രണയത്തിന് ശേഷം 2017 ല്‍ ആയിരുന്നു സമാന്തയുടെയും നാഗ ചൈതന്യയുടെയും വിവാഹം. എന്നാല്‍ നാല് വര്‍ഷത്തെ ദാമ്പത്യ ജീവിതത്തിനൊടുവില്‍ 2020 ല്‍ ഇരുവരും വേര്‍പിരിയല്‍ പ്രഖ്യാപിച്ചു. 2021 ല്‍ ആണ് ലീഗലി വിവാഹ മോചനം നേടിയത്. വിവാഹ മോചനത്തിന്റെ കാരണം ഇരുവരും വെളിപ്പെടുത്തിയിട്ടില്ല.
ആ ദാമ്പത്യ പരാജയം തന്നെ എത്രമാത്രം മാനസികമായി തകര്‍ത്തിരുന്നു എന്ന് പലതവണ സമാന്ത തുറന്ന് സംസാരിച്ചിട്ടുണ്ട്. വിവാഹ മോചനത്തിന് പിന്നാലെ മയോസൈറ്റിസ് എന്ന അപൂര്‍വ്വ രോഗം സ്ഥിരീകരിച്ചതും നടിയ്ക്ക് വലിയ തിരിച്ചടിയായിരുന്നു. എല്ലാത്തിനെയും അതിജീവിച്ച് സിനിമകളില്‍ സജീവമാവുകയാണ് സമാന്ത.
രാം രാഘവ് 2.0 എന്ന ഹിന്ദി സിനിമയിലൂടെ 2016 ല്‍ ആണ് ശോഭിത ധൂലിപാല അഭിനയ ലോകത്തേക്ക് വരുന്നത്. പിന്നീട് സൗത്ത് ഇന്ത്യന്‍ സിനിമകളില്‍ ശ്രദ്ധ കേന്ദ്രീകരിച്ച നടി മൂത്തോന്‍, കുറുപ്പ് എന്നീ മലയാള സിനിമകള്‍ക്ക് പുറമെ, പൊന്നിയന്‍ സെല്‍വന്‍ എന്ന ഹിസ്റ്റോറിക് ചിത്രത്തിന്റെയും ഭാഗമായിട്ടുണ്ട്.
