ഷിരൂർ: ഉത്തര കന്നഡയിലെ ഷിരൂരിൽ മണ്ണിടിച്ചിലിൽ കാണാതായ കോഴിക്കോട് സ്വദേശി അർജുനടക്കമുള്ള മൂന്നുപേർക്കായി ഗംഗാവലി പുഴയിൽ വീണ്ടും തിരച്ചിൽ നടത്തി. ഉഡുപ്പിയിൽ നിന്നുള്ള മത്സ്യത്തൊഴിലാളിയും മുങ്ങൽവിദഗ്ധനുമായ ഈശ്വർ മാൽപെ പുഴയിൽ നടത്തിയ തിരച്ചിലിൽ ലോറിയുടെ വീൽജാക്കിയും മറ്റു ഭാഗങ്ങളും കണ്ടെത്തി. ഇവ അർജുൻ്റെ ലോറിയുടേതാണെന്ന് ലോറിയുടമ മനാഫ് പറഞ്ഞു.ഇന്നത്തെ തിരച്ചിൽ വൈകുന്നേരത്തോടെ അവസാനിപ്പിച്ചു. ബുധനാഴ്ച രാവിലെ എട്ടു മണിമുതൽ തിരച്ചിൽ പുനരാരംഭിക്കാനാണ് ജില്ലാ ഭരണകൂടത്തിൻ്റെ തീരുമാനം. ഇക്കാര്യം ജില്ലാ ഭരണകൂടം അർജുൻ്റെ കുടുംബത്തെ അറിയിച്ചു. നേവിയുടെ സ്കൂബ സംഘവും തിരച്ചിലിൻ്റെ ഭാഗമാകും.
ഗംഗാവലി പുഴയിൽനിന്ന് കണ്ടെത്തിയത്
ഗംഗാവലി പുഴയിൽ ഈശ്വർ മാൽപെ നടത്തിയ പരിശോധനയിൽ അർജുൻ്റെ ലോറിയുടെ വീൽജാക്കി, കാണാതായ ടാങ്കർലോറിയുടെ രണ്ട് ഭാഗങ്ങൾ എന്നിവയാണ് കണ്ടെത്തിയത്. പുഴയുടെ തീരത്തേടു ചേർന്ന 200 മീറ്റർ ഭാഗത്താണ് ഈശ്വർ മാൽപെ ചൊവ്വാഴ്ച പരിശോധന നടത്തിയത്. ഒരു മണിക്കൂറോളം നീണ്ടുനിന്ന പരിശോധനയിൽ ഒൻപതോളം തവണ പുഴയുടെ അടിത്തട്ടിലേക്ക് മുങ്ങി പരിശോധന നടത്താൻ ഈശ്വർ മാൽപെയ്ക്കായി.
വെള്ളത്തിൻ്റെ ഒഴുക്ക് കുറഞ്ഞു: ഈശ്വർ മാൽപെ
ഗംഗാവലി പുഴയിലെ ഒഴുക്ക് കുറഞ്ഞതായി ഈശ്വർ മാൽപെ മാധ്യമപ്രവർത്തകരോട് പറഞ്ഞു. രാവിലെ എട്ടു മണിയോടെ തിരച്ചിൽ നടത്തിയാൽ പുഴയുടെ അടിഭാഗം വ്യക്തമായി കാണാനാകും. ഇന്നത്തെ തിരച്ചിലിൽ ജാക്കി കണ്ടെത്തി. പുഴയുടെ മധ്യഭാഗത്ത് 35 അടിയോളം താഴ്ചയുണ്ട്. രാവിലെ പുഴയുടെ അടിത്തട്ടിലേക്ക് മുങ്ങി കല്ലും മണ്ണും നീക്കി ലോറിയുണ്ടോയെന്നു പരിശോധിക്കും. ലോറി കണ്ടെത്താനാകുമെന്നാണ് പ്രതീക്ഷയെന്നും ഈശ്വർ മാൽപെ പറഞ്ഞു.
പ്രതീക്ഷയോടെ അർജുൻ്റെ കുടുംബം
ലോറിയുടെ ഭാഗങ്ങൾ കണ്ടെത്തിയതിൽ പ്രതീക്ഷയുണ്ടെന്ന് അർജുൻ്റെ സഹോദരീഭർത്താവ് ജിതിൻ പറഞ്ഞു. കണ്ടെത്തിയ ജാക്കി ലോറിയുടേതാണെന്ന് ഉറപ്പുവരുത്തിയിട്ടുണ്ട്. ബുധനാഴ്ച ഈശ്വർ മാൽപെയുടെ നേതൃത്വത്തിലുള്ള അഞ്ചംഗ സംഘവും നേവിയുടെ സംഘവും തിരച്ചിൽ നടത്തുകയാണെങ്കിൽ ഫലമുണ്ടാകുമെന്നാണ് പ്രതീക്ഷിക്കുന്നത്. നിലവിൽ കാലാവസ്ഥ അനുകൂലമാണെന്നും ജിതിൻ പറഞ്ഞു. എസ്ഡിആർഎഫ്, എൻഡിആർഎഫ് സംഘവും ബുധനാഴ്ചത്തെ തിരച്ചിലിൻ്റെ ഭാഗമാകുമെന്ന് ജിതിൻ കൂട്ടിച്ചേർത്തു.ഷിരൂർ അങ്കോലയിൽ ദേശീയപാത 66ൽ ജൂലൈ 16ന് രാവിലെ 8:45നുണ്ടായ മണ്ണിടിച്ചിലിലാണ് ലോറി ഡ്രൈവറായ അർജുൻ അകപ്പെട്ടത്. അർജുനെ കൂടാതെ, ലോകേഷ്, ജഗന്നാഥ് എന്നിവരെയും കാണാതായി. അപകടത്തിൽ മൊത്തം 10 പേരെയാണ് കാണാതായിരുന്നത്. ഏഴുപേരുടെ മൃതദേഹം കണ്ടെത്തിയിരുന്നു.
