കൽപ്പറ്റ: ഉരുൾപൊട്ടൽ ദുരന്തത്തിൽ നാട് പകച്ചു നിൽക്കുന്നനിടെ വയനാട്ടിലടക്കം വിവിധ ജില്ലകളിൽ ഭൂമിക്കടിയിൽനിന്ന് വലിയ മുഴക്കവും പ്രകമ്പനവും ഉണ്ടായതിൽ പരിഭ്രാന്തിയിലാണ് ജനം. വയനാട്, കോഴിക്കോട്, പാലക്കാട്, മലപ്പുറം ജില്ലകളിലാണ് അസാധാരണ പ്രതിഭാസം അനുഭവപ്പെട്ടത്. വയനാട്ടിൽ രാവിലെ 10:15ഓടെയാണ് ഭൂമിക്കടിയിൽനിന്ന് വലിയ മുഴക്കം അനുഭവപ്പെട്ടത്. അതേസമയം സംഭവത്തിന് പിന്നിൽ ഭൂചലനമല്ലെന്നാണ് സ്ഥിരീകരണം. ഭൂകമ്പമാപിനിയിൽ ഭൂചലനം രേഖപ്പെടുത്തിയിട്ടില്ലെന്ന് നാഷണൽ സീസ്മോളജി സെൻ്റർ ഡയറക്ടർ ഒപി മിശ്ര മാധ്യമങ്ങളോട് പറഞ്ഞു. ലാൻഡ് ഷിഫ്റ്റിങ് മൂലമാകാം വലിയ മുഴക്കവും പ്രകമ്പനവും ഉണ്ടായതെന്നും അദ്ദേഹം അറിയിച്ചു. ഭൂചലനവും ലാൻഡ് ഷിഫ്റ്റിങ്ങും; എന്താണ് വ്യത്യാസം?
ഭൂമിയുടെ ക്രസ്റ്റിൽ (ഭൂവൽക്കം) നിന്ന് ഊർജം പുറത്തേക്ക് തള്ളുന്നതുമൂലം പെട്ടെന്നുണ്ടാകുന്നതും തീവ്രവുമായ പ്രകമ്പനമാണ് ഭൂചലനം. ടെക്ടോണിക് പ്ലേറ്റിൻ്റെ ചലനം, അഗ്നിപർവതം, ഖനനം തുടങ്ങിയവ മൂലമാകാം ഇത്തരത്തിൽ ഊർജം പുറത്തേക്ക് തള്ളുന്നത്. പല തീവ്രതയിലാണ് ഭൂചലനം ഉണ്ടാകുക. ചിലപ്പോൾ വളരെ കുറഞ്ഞ പ്രകമ്പനം മാത്രം അനുഭവപ്പെടാം, അല്ലെങ്കിൽ വ്യാപക നാശം വിതയ്ക്കാം. റിക്ടർ സ്കെയിൽ അല്ലെങ്കിൽ മാഗ്നിട്യൂഡ് സ്കെയിൽ, സീസ്മോഗ്രാഫ് എന്നിവയിലൂടെ ഭൂചലനത്തിൻ്റെ തീവ്രത കണ്ടെത്താം. ഭൂചലനം കെട്ടിടങ്ങൾ തകർന്നുവീഴാനും സുനാമി, മണ്ണിടിച്ചിൽ എന്നിവ സംഭവിക്കാനും കാരണമായേക്കാം. ഭൂചലനത്തിൻ്റെ തീവ്രതയും ആഴയും അനുസരിച്ച് ഇതിൻ്റെ പ്രകമ്പനം കൂടുതൽ സ്ഥലങ്ങളിലേക്ക് അനുഭവപ്പെടാം. ഭൂമിയുടെ ക്രമാനുഗതമായ ചലനം അല്ലെങ്കിൽ രൂപഭേദമാണ് ലാൻഡ് ഷിഫ്റ്റിങ്. മണ്ണൊലിപ്പ് ഉൾപ്പെടെയുള്ള സ്വാഭാവിക പ്രതിഭാസങ്ങളും ഖനനം, നിർമാണം പോലെയുള്ള മനുഷ്യൻ്റെ പ്രവർത്തനങ്ങളും മൂലം ലാൻഡ് ഷിഫ്റ്റിങ് ഉണ്ടാകാം. ടെക്ടോണിക് പ്ലേറ്റിൻ്റെ ചലനവും ഇതിന് കാരണമാകും. കൂടുതൽ നേരം അനുഭവപ്പെടുമെങ്കിലും ഈ പ്രതിഭാസത്തിൻ്റെ ആഘാതം ഭൂചലനത്തിൻ്റെ അത്രത്തോളം ഉണ്ടാകില്ല. ജിയോളജിക്കൽ സർവേ, സാറ്റ്‍ലൈറ്റ് ഇമാജിനറി, ഗ്രൗണ്ട് പെനിട്രേറ്റിങ് റഡാർ എന്നിവ വഴി ലാൻഡ് ഷിഫിറ്റിങ് കണ്ടെത്താം. അതേസമയം കെട്ടിടം, റോഡ് തുടങ്ങിയവയുടെ നാശത്തിന് ഈ പ്രതിഭാസം ഇടയാക്കിയേക്കാം. ഭൂചലനം പോലെ പെട്ടെന്ന് ഉണ്ടാകുന്നതും അത്രത്തോളം നാശം വിതയ്ക്കുന്നതുമല്ല ലാൻഡ് ഷിഫ്റ്റിങ്. ശബ്ദം, മുഴക്കം, പ്രകമ്പനം; നാട്ടുകർക്ക് അനുഭവപ്പെട്ടത് പലത്
വയനാട്ടിൽ അമ്പലവയൽ വില്ലേജിലെ ആർഎആർഎസ്, മാങ്കോമ്പ്, നെന്മേനി വില്ലേജിലെ അമ്പുകുത്തി മാളിക, പടിപറമ്പ്, വൈത്തിരി താലൂക്കിലെ സുഗന്ധഗിരി, അച്ചൂരാൻ വില്ലേജിലെ സേട്ടുകുന്ന്, വെങ്ങപ്പള്ളി വില്ലേജിലെ കാരാറ്റപിടി, മൈലാടിപ്പടി, ചോലപ്പുറം, തൈക്കുംതറ ഭാഗങ്ങളിലാണ് ഭൂമിക്കടിയിൽനിന്നു ശബ്ദവും മുഴക്കവും അനുഭവപ്പെട്ടത്. ആദ്യം ഇടിവെട്ടിയതാണെന്നാണ് കരുതിയതെന്നും അൽപസമയത്തിന് ശേഷം പ്രകമ്പനം അനുഭവപ്പെട്ടുവെന്നും വയനാട്ടിലെ നാട്ടുകാർ പറഞ്ഞു. കുറച്ചുനേരം മുഴക്കം അനുഭവപ്പെട്ടുവെന്നാണ് മറ്റു പ്രദേശങ്ങളിലെ ആളുകൾ പറഞ്ഞു.
