ബെംഗളൂരു: ഇന്ത്യയുടെ പ്രധാന ഐടി നഗരങ്ങളിലൊന്നായ ബെംഗളൂരുവിൽ ഹോട്ടലുകളുടെയും ബാറുകളുടെയും ക്ലബ്ബുകളുടെയും പ്രവർത്തന സമയം നീട്ടി. രാത്രി ഒരു മണിവരെ തുറന്ന് പ്രവർത്തിക്കാമെന്ന് കർണാടക സർക്കാർ അറിയിച്ചു. ബൃഹത് ബംഗളൂരു മഹാനഗര പാലികെ (ബിബിഎംപി) പരിധിയിൽ പ്രവർത്തിക്കുന്ന ഹോട്ടലുകൾക്കും ബാറുകൾക്കും ക്ലബ്ബുകൾക്കുമാണ് ഈ അനുമതി നൽകിയിരിക്കുന്നത്. നഗരവികസന വകുപ്പ് ജൂലൈ 29ന് പുറപ്പെടുവിച്ച ഉത്തരവിലാണ് ഈ നിർദേശങ്ങളുള്ളത്.
കഴിഞ്ഞ വർഷത്തെ ബജറ്റിൽ ഇക്കാര്യത്തിൽ തീരുമാനമാനമാകുകയും നഗരവികസന വകുപ്പ് അനുമതി നൽകുകയും ചെയ്തിരുന്നു.
ബിബിഎംപി പരിധിയിൽ മദ്യം വിളമ്പുന്ന ഹോട്ടലുകൾ, ക്ലബ്ബുകൾ, ബാറുകൾ എന്നിവ നിലവിൽ പത്തിനും പതിനൊന്നിനുമാണ് അടച്ചിരുന്നത്. ഈ സമയക്രമത്തിനാണ് ഇനി മാറ്റം വരാൻ പോകുന്നത്. വിജ്ഞാപനമനുസരിച്ച് ബെംഗളൂരുവിലെ ക്ലബ്ബുകൾ, ഹോട്ടലുകൾ, ബാറുകൾ, റെസ്റ്റോറൻ്റുകൾ എന്നിവയ്ക്ക് ദിവസവും പുലർച്ചെ ഒരു മണിവരെ മദ്യം ഉൾപ്പെടെയുള്ള ഭക്ഷണവും പാനീയങ്ങളും വിളമ്പാം.
പുതിയ നിർദേശം അനുസരിച്ച് ബാറുകൾക്ക് രാവിലെ 10 മണി മുതൽ പുലർച്ചെ ഒരു മണിവരെ തുറന്ന് പ്രവർത്തിക്കാം. ക്ലബ്ബുകൾ (CL4 ലൈസൻസ്), സ്റ്റാർ ഹോട്ടലുകൾ (CL6 ലൈസൻസ്), CL7, CL7D ലൈസൻസുകളുള്ള ഹോട്ടലുകൾ, ലോഡ്ജുകൾ എന്നിവയ്ക്ക് രാവിലെ 9 മുതൽ പുലർച്ചെ ഒരുമണിവരെ പ്രവർത്തിക്കാൻ അനുവാദമുണ്ട്. CL9 ലൈസൻസുള്ള ബാറുകൾക്ക് രാവിലെ 10 മുതൽ ഒരു മണിവരെ പ്രവർത്തിക്കാം.
ബെംഗളൂരുവിലെ നൈറ്റ് ലൈഫ് സമയം നീട്ടി നൽകാനും അതുവഴി വ്യാപാരം വർധിപ്പിക്കാനും കർണാടക സർക്കാർ മുൻപ് തീരുമാനിച്ചിരുന്നു. ഇതനുസരിച്ച് ഹോട്ടലുകൾ, റെസ്റ്റോറൻ്റുകൾ, മാർക്കറ്റുകൾ എന്നിവയ്ക്ക് തുറന്ന് പ്രവർത്തിക്കാൻ അനുമതി നൽകുകയും ചെയ്തു. എന്നാൽ ജനങ്ങളുടെ ഭാഗത്ത് നിന്നും എതിർപ്പ് ശക്തമായതോടെ തീരുമാനം പിൻവലിക്കുകയും രാത്രി 11 മണിയോടെ എല്ലാ വ്യാപാര സ്ഥാപനങ്ങളും അടച്ചിടാൻ നിർദേശം നൽകുകയുമായിരുന്നു.
കഴിഞ്ഞ വർഷം ഫെബ്രുവരിയിൽ കർണാടക മുഖ്യമന്ത്രി സിദ്ധരാമയ്യ അവതരിപ്പിച്ച 2024 – 2025 സംസ്ഥാന ബജറ്റിൽ ബെംഗളൂരുവിൻ്റെ രാത്രി ജീവിത സമയം നീട്ടുന്ന കാര്യം പരാമർശിച്ചിരുന്നു. പുലർച്ചെ ഒരു മണിവരെ വ്യാപാര സ്ഥാപനങ്ങൾക്ക് പ്രവർത്തിക്കാമെന്ന് സിദ്ധരാമയ്യ വ്യക്തമാക്കുകയും ചെയ്തു. ഇതുവഴി വ്യാപാര മേഖലയ്ക്കുണ്ടാകുന്ന ഉണർവാണ് സർക്കാർ ലക്ഷ്യമിടുന്നത്.
