ദുലീപ് ട്രോഫി ക്രിക്കറ്റ് (Duleep Trophy) ടൂര്‍ണമെന്റിന്റെ ആദ്യ റൗണ്ടിനുള്ള ടീമുകളെയും കളിക്കാരെയും കഴിഞ്ഞ ദിവസമാണ് ഇന്ത്യന്‍ ക്രിക്കറ്റ് കണ്‍ട്രോള്‍ ബോര്‍ഡ് (ബിസിസിഐ) കഴിഞ്ഞ ദിവസമാണ് പ്രഖ്യാപിച്ചത്. മേഖലാ അടിസ്ഥാനത്തില്‍ നാല് ടീമുകളാക്കിയാണ് ഇത്രയും കാലം ടൂര്‍ണമെന്റ് നടന്നിരുന്നതെങ്കില്‍ ഇത്തവണ അതില്‍ വലിയ മാറ്റമുണ്ട്. സോണ്‍ ഒഴിവാക്കി ഇന്ത്യന്‍ ക്രിക്കറ്റിലെ മികച്ച താരങ്ങളെയെല്ലാം നാല് ടീമുകളിലായി അണിനിരത്തുകയാണ്. അജിത് അഗാര്‍ക്കറുടെ നേതൃത്വത്തിലുള്ള സെലക്ഷന്‍ കമ്മിറ്റിയാണ് കളിക്കാരെ തെരഞ്ഞെടുത്തത്.ഇന്ത്യന്‍ ക്യാപ്റ്റന്‍ രോഹിത് ശര്‍മ (Rohit Sharma) യും സൂപ്പര്‍ ബാറ്റര്‍ വിരാട് കോഹ്‌ലി (Virat Kohli) യും ദുലീപ് ട്രോഫിയില്‍ കളിക്കുമെന്നായിരുന്നു റിപോര്‍ട്ടുകളെങ്കിലും മറിച്ചാണ് സംഭവിച്ചത്. ഇരുവരും ആഭ്യന്തര ക്രിക്കറ്റില്‍ നിന്ന് കുറച്ചുകാലം കൂടി വിട്ടുനില്‍ക്കും.2013ന് ശേഷം വിരാട് കോഹ്‌ലി ഡല്‍ഹിക്ക് വേണ്ടി കളിച്ചിട്ടില്ല. 2018ലാണ് രോഹിത് ശര്‍മ അവസാനമായി മുംബൈയെ പ്രതിനിധീകരിച്ചത്. ബന്ധപ്പെട്ട വൃത്തങ്ങളെ ഉദ്ധരിച്ച് ഇഎസ്പിഎന്‍ക്രിക്ഇന്‍ഫോ ഇതിന്റെ കാരണം വെളിപ്പെടുത്തി. ദേശീയ ടീമിന്റെ ഹോം സീസണിന് മുന്നോടിയായി സീനിയറായ രണ്ടു പേര്‍ക്കും മതിയായ വിശ്രമം നല്‍കണമെന്നതിനാലാണ് ഈ നടപടി.അടുത്ത നാല് മാസത്തിനിടെ 10 അന്താരാഷ്ട്ര ടെസ്റ്റ് മല്‍സരങ്ങളാണ് ഇന്ത്യയെ കാത്തിരിക്കുന്നത്. ടി20 ലോകകപ്പും ശ്രീലങ്കന്‍ പര്യടനവും ഉള്‍പ്പെടെ തിരക്കേറിയ വൈറ്റ് ബോള്‍ മല്‍സരങ്ങള്‍ക്ക് ശേഷം റെഡ് ബോള്‍ സീസണ്‍ ആരംഭിക്കുകയാണ്. സെപ്റ്റബര്‍ 19നാണ് ബംഗ്ലാദേശിനെതിരായ ടെസ്റ്റ് പരമ്പരയിലെ ആദ്യ മാച്ച്. പിന്നാലെ ന്യൂസിലന്റും ഇന്ത്യയിലെത്തും. അഞ്ച് ടെസ്റ്റ് മല്‍രങ്ങള്‍ക്ക് ശേഷം ടീമംഗങ്ങള്‍ ഓസ്്‌ട്രേലിയയില്‍ ടെസ്റ്റ് പരമ്പരയ്ക്കായി യാത്രതിരിക്കും. ഇതേസമയത്ത് ടി20 താരങ്ങള്‍ നാല് മല്‍സരങ്ങളുടെ പരമ്പരയ്ക്കായി ദക്ഷിണാഫ്രിക്കയിലേക്കു പോകും.വിരാട് കോഹ്‌ലിക്കും രോഹിതിനും പുറമേ മികച്ച താരങ്ങളായ ജസ്പ്രിത് ബുംറയും ആര്‍ അശ്വിനും ദുലീപ് ട്രോഫിയില്‍ കളിക്കുന്നില്ല. ബുംറയുടെ അസാന്നിധ്യം അപ്രതീക്ഷിതമായിരുന്നില്ല. മല്‍സരാധിക്യത്തില്‍ നിന്ന് ഇന്ത്യയുടെ സൂപ്പര്‍ പേസ് ബൗളറെ സംരക്ഷിക്കുന്നതിന് ബിസിസിഐ അധികൃതര്‍ നേരത്തേ തന്നെ ചില ക്രമീകരണങ്ങള്‍ വരുത്തിയത് തുടരുകയാണ്. അശ്വിന്‍ സ്ഥിരമായി ആഭ്യന്തര ക്രിക്കറ്റില്‍ കളിച്ചുവരുന്നുണ്ട്. ഈയിടെ തമിഴ്‌നാട് പ്രീമിയര്‍ ലീഗില്‍ ദിണ്ടിഗല്‍ ഡ്രാഗന്‍സിനെ അദ്ദേഹം കിരീടത്തിലേക്ക് നയിച്ചിരുന്നു. എന്നാല്‍ ദുലീപ് ട്രോഫിയില്‍ നാല് ടീമുകളിലൊന്നിലും അശ്വിന്റെ പേരില്ലാത്തത് ആശ്ചര്യപ്പെടുത്തുന്നു.
