ന്യൂഡൽഹി: കേരളമടക്കമുള്ള സംസ്ഥാനങ്ങൾ വന്ദേ ഭാരത് ട്രെയിനുകൾ ഏറ്റെടുത്തുകഴിഞ്ഞു. കേരളത്തിൽ മൂന്ന് വന്ദേ ഭാരത് ട്രെയിനുകളാണ് സർവീസ് നടത്തുന്നത്. കൂടുതൽ വന്ദേ ഭാരത് ട്രെയിനുകൾ ലഭിക്കുമെന്ന പ്രതീക്ഷയിലാണ് കേരളമടക്കമുള്ള സംസ്ഥാനങ്ങൾ. എന്നാൽ നൂതന സാങ്കേതികവിദ്യയിൽ എല്ലാവിധ സൗകര്യങ്ങളും വാഗ്ദാനം ചെയ്യുന്ന വന്ദേ ഭാരത് സ്ലീപ്പർ ട്രെയിനുകൾ ഈ വർഷം പുറത്തിറങ്ങുമെന്ന റിപ്പോർട്ടുകളാണ് ഇപ്പോൾ പുറത്തുവരുന്നത്.
ഇന്ത്യയിലെ ആദ്യ വന്ദേ ഭാരത് സ്ലീപ്പർ ട്രെയിൻ വർഷാവസാനത്തോടെ പ്രവർത്തനക്ഷമമാകുമെന്ന സൂചനകളാണ് അധികൃതർ നൽകുന്നത്. സെപ്റ്റംബർ ഇരുപതിനകം വന്ദേ ഭാരത് സ്ലീപ്പർ ട്രെയിൻ എത്തുമെന്ന് ചെന്നൈയിലെ ഇൻ്റഗ്രൽ കോച്ച് ഫാക്ടറി (ഐസിഎഫ്) ജനറൽ മാനേജർ യു സുബ്ബ റാവു വ്യക്തമാക്കിയതായി മണികൺട്രോൺ റിപ്പോർട്ട് ചെയ്തു. ബെംഗളൂരുവിലെ ഭാരത് എർത്ത് മൂവേഴ്‌സ് ലിമിറ്റഡിൻ്റെ (ബിഇഎംഎൽ) പ്ലാൻ്റിലാണ് വന്ദേ ഭാരത് സ്ലീപ്പർ ട്രെയിനുകളുടെ നിർമാണം പുരോഗമിക്കുന്നത്.
നിർമാണവുമായി ബിഇഎംഎൽ മുന്നോട്ട് പോകുകയാണെന്ന് റാവു പറഞ്ഞു. സെപ്റ്റംബർ ഇരുപതിനകം ആദ്യ കോച്ചുകൾ ചെന്നൈയിലെ ഐസിഎഫിൽ എത്തുമെന്നാണ് പ്രതീക്ഷിക്കുന്നത്. തുടർന്നാകും റേക്കുമായുള്ള സംയോജനമടക്കമുള്ള പ്രവൃത്തികൾ നടക്കുക. അന്തിമ പരിശോധനയ്ക്കും കമ്മീഷൻ ചെയ്യൽ ചെയ്യൽ നടപടികൾക്കുമായി ഏകദേശം 15 – 20 ദിവസമെടുക്കും. ലഖ്‌നൗ ആസ്ഥാനമായുള്ള റെയിൽവേ ഡിസൈൻ ആൻഡ് സ്റ്റാൻഡേർഡ് ഓർഗനൈസേഷൻ്റെ മേൽനോട്ടത്തിൽ ഒരു മാസത്തിലധികം നീണ്ടുനിൽക്കുന്ന പരിശോധനകൾ ഉൾപ്പെടെയുള്ള നടപടികൾ പൂർത്തിയാക്കും. നോർത്ത് വെസ്റ്റേൺ റെയിൽവേ സോണിൽ ട്രയൽ റൺ നടത്തനാണ് സാധ്യതയെന്ന് റാവു കൂട്ടിച്ചേർത്തു.
പരിശോധനകൾക്കും ട്രയൽ റണ്ണുകൾക്കും ശേഷം 2024 ഡിസംബറോടെ ട്രെയിൻ പ്രവർത്തനക്ഷമമാകുമെന്ന് റാവു പറഞ്ഞു. 16 കോച്ചുകളുള്ള വന്ദേ ഭാരത് സ്ലീപ്പർ ട്രെയിനുകളുടെ നിർമാണത്തിനായി 2023 മെയ് മാസത്തിലാണ് ചെന്നൈയിലെ ഇൻ്റഗ്രൽ കോച്ച് ഫാക്ടറിക്ക് കരാർ നൽകിയത്. ബെംഗളൂരുവിലെ ബിഇഎംഎല്ലിൽ ട്രെയിനിൻ്റെ ലോ സ്പീഡ് ട്രയൽ റണ്ണുകൾ നടത്തുന്നുണ്ടെന്ന് ഐസിഎഫ് വൃത്തങ്ങൾ അറിയിച്ചു. ശേഷിക്കുന്ന ഇൻ്റീരിയർ ജോലികൾ പൂർത്തിയാക്കി കോച്ചുകൾ ഐസിഎഫിലേക്ക് അയക്കാനുള്ള ശ്രമത്തിലാണ് ബിഇഎംഎൽ. പരമാവധി 160 കിലോമീറ്റർ വേഗതയിലാകും വന്ദേ ഭാരത് സ്ലീപ്പർ സഞ്ചരിക്കുക. 16 കോച്ചുകളുള്ള വന്ദേ ഭാരത് സ്ലീപ്പർ ട്രെയിനിൽ 823 ബെർത്തുകളുണ്ടാകും. ഓരോ സ്ലീപ്പർ ബർത്തിലും റീഡിങ് ലൈറ്റുകൾ, ചാർജിങ് സോക്കറ്റുകൾ, ഒരു മൊബൈൽ / മാഗസിൻ ഹോൾഡർ, സ്നാക്ക് ടേബിൾ എന്നിവ ഉണ്ടായിരിക്കും.
