ന്യൂഡൽഹി: വന്ദേ ഭാരത്, വന്ദേ മെട്രോ ട്രെയിനുകൾ കയറ്റുമതി ചെയ്യാൻ തയ്യാറെടുത്ത് പൊതുമേഖലാ സ്ഥാപനമായ ബിഇഎംഎൽ ലിമിറ്റഡ്. ഇതിനകം തന്നെ നിരവധി വന്ദേ ഭാരത് ട്രെയിനുകൾ ബിഇഎംഎൽ രാജ്യത്തിനകത്ത് ഡെലിവർ ചെയ്തു കഴിഞ്ഞു. ഇന്ത്യയിൽ വൻ വിജയമായി മാറിയ വന്ദേ ഭാരത് ട്രെയിനുകൾക്ക് വിദേശത്തും ആവശ്യക്കാരുണ്ടാകും എന്നു തന്നെയാണ് പ്രതീക്ഷിക്കപ്പെടുന്നത്.
ദക്ഷിണാഫ്രിക്ക, ആസിയാൻ രാജ്യങ്ങൾ, മധ്യേഷ്യൻ രാജ്യങ്ങൾ തുടങ്ങിയവയാണ് തങ്ങളുടെ ലക്ഷ്യമെന്ന് ഇക്കണോമിക് ടൈംസിന് നൽകിയ അഭിമുഖത്തില്‍ കമ്പനി ചെയര്‍മാൻ ശന്തനു റോയ് പറഞ്ഞു. ഈ വിപണികളിൽ വന്ദേ ഭാരത് ട്രെയിനുകൾക്ക് വിപണി കണ്ടെത്താൻ കഴിഞ്ഞേക്കും. നിലവിൽ രാജ്യത്തിന് വേണ്ടിയുള്ള ഉൽപ്പാദനത്തിലാണ് ശ്രദ്ധ കേന്ദ്രീകരിച്ചിരിക്കുന്നത്. കയറ്റുമതിയിലേക്ക് അധികം താമസിയാതെ തന്നെ കടക്കാൻ കഴിയുമെന്നും അദ്ദേഹം പ്രത്യാശ പ്രകടിപ്പിച്ചു.നിലവിൽ 4 ശതമാനമാണ് ബിഇഎംഎലിന്റെ കയറ്റുമതി. ഇത് പത്ത് ശതമാനത്തിലേക്ക് ഉയർത്തുകയാണ് ലക്ഷ്യമെന്ന് ശന്തനു റോയ് പറയുന്നു. നിലവിൽ പ്രതിരോധ ഉൽപ്പന്നങ്ങളാണ് ബിഇഎംഎലിന്റെ വിദേശത്തുനിന്നുള്ള പ്രധാന വരുമാനം. ഇതോടൊപ്പം ട്രെയിൻ കയറ്റുമതി കൂടി ചേരുമ്പോൾ വരുമാനം വൻതോതിൽ ഉയർത്താൻ കഴിയുമെന്നാണ് ബി ഇ എം എൽ പ്രതീക്ഷിക്കുന്നത്. മൂന്ന് മേഖലകളിലാണ് കമ്പനി ഫോക്കസ് ചെയ്യുന്നത്. ഒന്ന് ഡിഫൻസ്, രണ്ട് മൈനിങ്, മൂന്ന് മെട്രോയും റെയിലും. ഈ സെഗ്മെന്റുകൾ ഓരോന്നിനും പ്രത്യേകം സിഇഒമാരുണ്ട്. ഇതുവഴി കൂടുതൽ ലക്ഷ്യകേന്ദ്രിതമായി പ്രവർത്തിക്കാൻ കഴിയുന്നു. പ്രവർത്തനങ്ങളെ കാര്യക്ഷമമാക്കാനും സാധിക്കുന്നുണ്ട്.മുൻവർഷങ്ങളെക്കാൾ മികച്ച നിലയിലേക്ക് ലാഭം വളർത്താൻ തങ്ങൾക്ക് കഴിഞ്ഞിട്ടുണ്ടെന്ന് ശന്തനു റോയ് പറഞ്ഞു. മേക്ക് ഇൻ ഇന്ത്യ ഇനീഷ്യേറ്റീവ് ശക്തമാക്കാനുള്ള ശ്രമങ്ങളാണ് നടത്തുന്നത്. നിലവിൽ വന്ദേ സ്ലീപ്പർ ട്രെയിനുകളുടെ നിർമ്മാണത്തിലാണ് ബി ഇ എം എൽ ഉള്ളത്. സ്ലീപ്പറിന്റെ പ്രോട്ടോടൈപ്പ് കുറച്ച് മാസങ്ങൾക്കുള്ളിൽ പുറത്തിറങ്ങുമെന്നാണ് വിവരം. ഓഗസ്റ്റിൽ വന്ദേ ഭാരത് സ്ലീപ്പർ ട്രെയിനിൻ്റെ ആദ്യ പ്രോട്ടോടൈപ്പ് റെയിൽവേ പുറത്തിറക്കിയേക്കുമെന്ന് ടൈംസ് ഓഫ് ഇന്ത്യ റിപ്പോർട്ട് ചെയ്തിരുന്നു.ബെമലിന്റെ ബെംഗളൂരു ഫാക്ടറിയിലാണു വന്ദേ ഭാരത് സ്ലീപ്പർ കോച്ചുകളുടെ നിർമാണം പുരോഗമിക്കുന്നത്. ഡിസംബറോടെ 10 ട്രെയിനുകളുടെ നിർമാണം പൂർത്തിയാകും. രാജധാനി ട്രെയിനിലെ പോലെ പൂർണമായും എസി കോച്ചുകൾ മാത്രമാകും വന്ദേഭാരത് സ്ലീപ്പറിലും.
