വാഷിങ്ടൺ: വിനോദസഞ്ചാരികൾ ഏറെ ഭയക്കുന്ന നഗരങ്ങളുടെ പട്ടികയിൽ രണ്ടാം സ്ഥാനം ഇന്ത്യയുടെ അയൽരാജ്യമായ പാകിസ്താനിലെന്ന് റിപ്പോർട്ട്. ഫോർബ്സ് അഡൈ്വസറിൻ്റെ സമീപകാല റിപ്പോർട്ടിലാണ് ഏറ്റവും അപകടസാധ്യതയുള്ള നഗരങ്ങളുടെ പട്ടികയുള്ളത്. വിനോദഞ്ചാരികൾക്ക് ഭയക്കുന്ന ഒന്നാമത്തെ നഗരം വെനസ്വേലയിലെ കാരക്കാസ് ആണ്. ഏറ്റവും അപകടസാധ്യതയുള്ള രണ്ടാമത്തെ നഗരം കറാച്ചിയാണ്. റിപ്പോർട്ട് പ്രകാരം ഏറ്റവും അപകടസാധ്യതയുള്ള നഗരങ്ങളിൽ ബംഗ്ലാദേശിൻ്റെ തലസ്ഥാനമായ ധാക്ക ആറാം സ്ഥാനത്തുണ്ടെന്നത് ശ്രദ്ധേയമാണ്.
ഏറ്റവും അപകടസാധ്യതയുള്ള നഗരമായി വിനോദസഞ്ചാരികൾ വിലയിരുത്തുന്ന നഗരമാണ് കാരക്കാസ്. കുറ്റകൃത്യങ്ങൾ, അക്രമം, തീവ്രവാദ ഭീഷണി, പ്രകൃതി ദുരന്തങ്ങൾ, സാമ്പത്തിക പരാധീനത എന്നിവ അടിസ്ഥാനപ്പെടുത്തിയാണ് അപകടസാധ്യത വിലയിരുത്തുന്നത്. ഈ സാഹചര്യങ്ങൾ വ്യക്തിസുരക്ഷ അപകടത്തിലാക്കുന്നുവെന്നാണ് വിനോദഞ്ചാരികൾ വ്യക്തമാക്കുന്നത്.
കാരക്കാസ് (വെനസ്വേല), കറാച്ചി (പാകിസ്താൻ), യാങ്കോൺ (ബർമ്മ), ലാഗോസ് (നൈജീരിയ), മനില (ഫിലിപ്പീൻസ്) എന്നീ നഗരങ്ങളാണ് ആദ്യ അഞ്ചിലുള്ളത്. ധാക്ക (ബംഗ്ലാദേശ്), ബൊഗോട്ട (കൊളംബിയ), കെയ്റോ (ഈജിപ്ത്), മെക്സിക്കോ സിറ്റി (മെക്സിക്കോ), ക്വിറ്റോ (ഇക്വഡോർ) എന്നീ നഗരങ്ങളാണ് പിന്നാലെയുള്ളത്. റിപ്പോർട്ട് പ്രകാരം കറാച്ചി ആഗോളതലത്തിൽ മോശം അടിസ്ഥാന സൗകര്യങ്ങളുള്ള നഗരം കൂടിയാണ്. രാഷ്ട്രീയവും സാമ്പത്തിക പരാധീനതകളും തുടർന്നുള്ള കുറ്റകൃത്യങ്ങളും അക്രമണങ്ങളുമാണ് യാങ്കൂൺ നേരിടുന്ന പ്രതിസന്ധി.
വിനോദസഞ്ചാരികൾക്ക് ഏറ്റവും സുരക്ഷിതമായ നഗരമായി ഫോർബ്സ് അഡ്വൈസർ കണ്ടെത്തിയിരിക്കുന്നത് സിംഗപ്പൂർ ആണ്. സുരക്ഷ, മികച്ച ഇൻഫ്രാസ്ട്രക്ചർ, കുറ്റകൃത്യങ്ങളുടെ കുറവ്, സാമ്പത്തിക നിലവാരം, ജീവിത നിലവാരം എന്നിവയാണ് സിംഗപ്പൂരിനെ ലോകത്തിലെ ഏറ്റവും സുരക്ഷിതമായ നഗരമാക്കി മാറ്റുന്നത്. ശക്തമായ പൊതു സുരക്ഷാ നടപടികളും ഉയർന്ന നിലവാരമുള്ള അടിസ്ഥാന സൗകര്യങ്ങളുമുള്ള ടൊറൻ്റോ ഏറ്റവും സുരക്ഷിതമായ നഗരങ്ങളിൽ ഒന്നാണ്. ഈ പട്ടികയിൽ ജപ്പാൻ തലസ്ഥാനമായ ടോക്കിയോയും മുൻപന്തിയിലാണ്.
വിനോദ സഞ്ചാരികൾക്ക് സുരക്ഷിതമായ നഗരങ്ങൾ
സിംഗപ്പൂർ
ടോക്കിയോ (ജപ്പാൻ)
ടൊറൻ്റോ (കാനഡ)
സിഡ്നി, (ഓസ്ട്രേലിയ)
സൂറിച്ച് (സ്വിറ്റ്സർലൻഡ്)
കോപ്പൻഹേഗൻ (ഡെൻമാർക്ക്)
സിയോൾ (ദക്ഷിണ കൊറിയ)
ഒസാക്ക (ജപ്പാൻ)
മെൽബൺ (ഓസ്ട്രേലിയ)
ആംസ്റ്റർഡാം (നെതർലാൻഡ്‌സ്)
ഏറ്റവും സുരക്ഷിതവും അപകടസാധ്യതയുള്ളതുമായ നഗരങ്ങളിൽ ഏഷ്യൻ രാജ്യങ്ങൾ മുന്നിൽ തന്നെയുണ്ട്. ഭയക്കുന്ന നഗരങ്ങളുടെ പട്ടികയിൽ യൂറോപ്യൻ നഗരങ്ങൾ പിന്നിലാണ്. അപകടസാധ്യതയുടെ കാര്യത്തിൽ യൂറോപ്യൻ നഗരമായ ഇറ്റലിയിലെ മിലാൻ ഇരുപത്തിയാറാം സ്ഥാനത്താണ്. റോം ഇരുപത്തിയെട്ടാമതും പാരീസ് 31മതുമാണ്. സൂറിച്ച്, കോപ്പൻഹേഗൻ, ആംസ്റ്റർഡാം തുടങ്ങിയ നഗരങ്ങൾ ആഗോളതലത്തിൽ ഏറ്റവും സുരക്ഷിത നഗരങ്ങളാണ്.
