ഇന്ത്യൻ സൂപ്പർ ലീഗ് ( ഐ എസ് എൽ ) ഫുട്ബോളിൽ കേരള ബ്ലാസ്റ്റേഴ്സ് എഫ് സിയെ ഭൂതം കാക്കുന്നതുപോലെ കാത്തു സംരക്ഷിക്കുന്ന കളിക്കാരനാണ് ഉറുഗ്വെൻ പ്ലേമേക്കറായ അഡ്രിയാൻ ലൂണ. 2024 – 2025 ഐ എസ് എൽ സീസണിൽ അഡ്രിയാൻ ലൂണയുടെ ക്യാപ്റ്റൻസിയിലാണ് കേരള ബ്ലാസ്റ്റേഴ്സ് എഫ് സി ഇറങ്ങുന്നത്.
അതേ സമയം സ്വന്തം തട്ടകമായ കൊച്ചിയിലെ ജവഹർലാൽ നെഹ്റു സ്റ്റേഡിയത്തിൽ നടന്ന മത്സരത്തിൽ കേരള ബ്ലാസ്റ്റേഴ്സ് എഫ് സിക്ക് ഒപ്പം അഡ്രിയാൻ ലൂണ കളത്തിൽ ഇറങ്ങിയിരുന്നില്ല. അസുഖ ബാധിതൻ ആയതിനാലായിരുന്നു സീസണിലെ ആദ്യ ഐ എസ് എൽ മത്സരത്തിൽ അഡ്രിയാൻ ലൂണ കേരള ബ്ലാസ്റ്റേഴ്സ് എഫ് സിക്ക് ഒപ്പം കളിക്കാതിരുന്നത്.
2024 – 2025 പ്രീ സീസൺ ട്രാൻസ്ഫർ വിൻഡോയിൽ അഡ്രിയാൻ ലൂണയെ സ്വന്തമാക്കാൻ എഫ് സി ഗോവ ശ്രമിച്ചിരുന്നു എന്ന റിപ്പോർട്ട് ഇപ്പോൾ പുറത്തു വന്നിട്ടുണ്ട്. അഡ്രിയാൻ ലൂണ ആ നീക്കത്തിനോട് പോസിറ്റീവായി പ്രതികരിച്ചിരുന്നെങ്കിൽ എഫ് സി ഗോവ ജേഴ്സിയിൽ അദ്ദേഹം കളിക്കുമായിരുന്നു. എന്നാൽ, എഫ് സി ഗോവയുമായി നടത്തിയ ചർച്ചയിൽ അഡ്രിയാൻ ലൂണ സംതൃപ്തൻ അല്ലായിരുന്നു. അതോടെയാണ് ഉറുഗ്വെൻ പ്ലേ മേക്കർ കേരള ബ്ലാസ്റ്റേഴ്സ് എഫ് സി യിൽ തുടരാൻ തീരുമാനിച്ചത് എന്നാണ് ഇപ്പോൾ പുറത്തു വരുന്ന വിവരം.
അതേസമയം, മൊറോക്കൻ ലെഫ്റ്റ് വിങ്ങറായ നോഹ സദൗയിയെ കേരള ബ്ലാസ്റ്റേഴ്സ് എഫ് സി, എഫ് സി ഗോവയിൽ നിന്ന് സ്വന്തമാക്കിയിരുന്നു. 2026 മേയ് 31 വരെ നീളുന്ന കരാറിലാണ് നോഹ സദൗയി കേരള ബ്ലാസ്റ്റേഴ്സ് എഫ് സി യുമായി ഒപ്പു വെച്ചിരിക്കുന്നത്. 2022 ലായിരുന്നു മൊറോക്കൻ ലെഫ്റ്റ് വിങ്ങർ എഫ് സി ഗോവയിൽ എത്തിയത്.
അതേസമയം, 2021 മുതൽ കേരള ബ്ലാസ്റ്റേഴ്സ് എഫ് സി ക്യാമ്പിലുള്ള കളിക്കാരനാണ് അഡ്രിയാൻ ലൂണ. കേരള ബ്ലാസ്റ്റേഴ്സ് എഫ് സിക്ക് അടുത്ത കാലത്ത് ലഭിച്ച ഏറ്റവും മികച്ച പ്ലേ മേക്കറാണ് ഇദ്ദേഹം. അതുകൊണ്ടുതന്നെ താരത്തെ വിട്ടുകളയാൻ കേരള ബ്ലാസ്റ്റേഴ്സ് എഫ് സി ഇതുവരെ തയാറായിട്ടില്ല.
2021 – 2022 സീസണിൽ രണ്ടു വർഷ കരാറിലാണ് അഡ്രിയാൻ ലൂണ കേരള ബ്ലാസ്റ്റേഴ്സ് എഫ് സി യിൽ എത്തിയത്. പിന്നീട് കരാർ ദീർഘിപ്പിച്ചു. നിലവിലെ ഏറ്റവും പുതിയ കരാർ അടിസ്ഥാനത്തിൽ 2027 മേയ് 31 വരെ അഡ്രിയാൻ ലൂണ കൊച്ചി ക്ലബ്ബിൽ തുടരും. 31 കാരനായ ഈ അറ്റാക്കിങ് മിഡ്ഫീൽഡർ കേരള ബ്ലാസ്റ്റേഴ്സ് എഫ് സിക്കു വേണ്ടി ഇതുവരെ ആകെ 61 മത്സരങ്ങളിൽ ബൂട്ട് അണിഞ്ഞു. 15 ഗോൾ സ്വന്തമാക്കി. 20 ഗോളിന് അസിസ്റ്റ് നടത്തി.
2024 – 2025 ഐ എസ് എൽ സീസണിൽ കേരള ബ്ലാസ്റ്റേഴ്സ് എഫ് സി യുടെ അടുത്ത മത്സരത്തിൽ അഡ്രിയാൻ ലൂണ കളത്തിൽ എത്തും എന്നാണ് മുഖ്യ പരിശീലകനായ മികായേൽ സ്റ്റാറെ അറിയിച്ചത്. സീസണിലെ ആദ്യ മത്സരത്തിൽ അഡ്രിയാൻ ലൂണയുടെ അഭാവത്തിൽ ഇറങ്ങിയ കേരള ബ്ലാസ്റ്റേഴ്സ് എഫ് സി 1 – 2 ന് പഞ്ചാബ് എഫ് സി യോട് പരാജയപ്പെട്ടിരുന്നു. മത്സരത്തിന്റെ അവസാന 10 മിനിറ്റിനുള്ളിൽ ആയിരുന്നു മൂന്നു ഗോളും പിറന്നത്. സെപ്റ്റംബർ 22 ന് ഈസ്റ്റ് ബംഗാളിന് എതിരേയാണ് ബ്ലാസ്റ്റേഴ്സിന്റെ അടുത്ത മത്സരം.
