ആദ്യത്തെ കണ്മണിയെ വരവേല്‍ക്കാന്‍ ഒരുങ്ങി നില്‍ക്കുകയാണ് ബോളിവുഡ് ക്വീന്‍ ദീപിക പദുക്കോണും ഭര്‍ത്താവ് രണ്‍വീര്‍ സിംഗും. അടുത്ത മാസം കുഞ്ഞ് എത്തും, അതിനുള്ളില്‍ പുതിയ വീടിന്റെ പണി പൂര്‍ത്തിയാക്കും. കുഞ്ഞ് പിറക്കുന്നതിന് മുന്‍പേ തന്നെ പുതിയ വീടിന്റെ പണി പൂര്‍ത്തിയാക്കാനുള്ള തിരക്കിലാണ് രണ്‍വീറും ദീപിക പദുക്കോണും.
മുംബൈയിലെ ബാന്ദ്രയിലാണ് പുതിയ വീട്. കടലിന് അഭിമുഖമായി പണിയുന്ന വീടിന് നൂറ് കോടിയോളം വിലമതിക്കും എന്നാണ് വിവരം. നാല് നിലകളിലായി 11,266 സ്‌ക്വര്‍ഫീറ്റിലാണ് വീട്. ഷാരൂഖ് ഖാന്റെ മന്നത്ത് എന്ന ബംഗ്ലാവിന് സമീപത്തായി തന്നെയാണ് ദീപികയുടെയും രണ്‍വീറിന്റെയും വീട്. നേരത്തെ അലിബാഗില്‍ 22 കോടിയുടെ ഒരു ബംഗ്ലാവ് താരദമ്പതികള്‍ സ്വന്തമാക്കിയിരുന്നു.
2013 ല്‍ സഞ്ജയ് ലീല ബന്‍സാലി എന്ന സിനിമയില്‍ അഭിനയിച്ചുകൊണ്ടിരിയ്ക്കുമ്പോഴാണ് ദീപിക പദുക്കോണും രണ്‍വീര്‍ സിംഗും പ്രണയത്തിലായത്. അതിന് ശേഷം 2015 ല്‍ ബാജിറാവു മസ്താനി എന്ന ചിത്രത്തിലും ഒന്നിച്ചഭിനയിച്ചും. അതിന് ശേഷം ഇരുവരും ഒന്നിച്ച് ഫൈന്റിങ് വണ്ണി, 83, സര്‍ക്കസ് തുടങ്ങിയ സിനിമകളില്‍ അഭിനയിച്ചിട്ടുണ്ട്
2018 ല്‍ ആയിരുന്നു ദീപികയുടെയും രണ്‍വീറിന്റെയും സ്വപ്‌ന തുല്യമായ വിവാഹം. എന്നാല്‍ വിവാഹം കഴിഞ്ഞ് അഞ്ച് വര്‍ഷങ്ങള്‍ക്ക് ശേഷമാണ് ഇരുവരും വിവാഹ വീഡിയോ പുറത്തുവിട്ടത്. 2023 ല്‍ കരണ്‍ ജോഹറിന്റെ ചാറ്റ് ഷോയില്‍ കല്യാണ വീഡിയോ പുറത്ത് വരികയും വൈറലാവുകയും ചെയ്തു. മാസങ്ങള്‍ക്കകം ദീപിക ഗര്‍ഭിണിയാണ് എന്നും, 2024 സെപ്റ്റംബറില്‍ കുഞ്ഞ് എത്തും എന്നുമുള്ള സന്തോഷ വാര്‍ത്തയാണ് ദമ്പതികള്‍ പങ്കുവച്ചത്.
കല്‍കി 2898 എഡിയാണ് ദീപികയുടേതായി ഏറ്റവുമൊടുവില്‍ പുറത്തിറങ്ങിയ സിനിമ. പ്രഭാസ്, അമിതാഭ് ബച്ചന്‍ തുടങ്ങിയവര്‍ കേന്ദ്ര കഥാപാത്രമായി എത്തിയ പാന്‍ ഇന്ത്യന്‍ ചിത്രമായ കല്‍കിയുടെ പ്രമോഷന്‍ ചടങ്ങുകളില്‍ നിറവയറുമായി എത്തിയ ദീപികയുടെ ഫോട്ടോകളും വീഡിയോകളും എല്ലാം വൈറലായിരുന്നു.
