Namma Metro Phase 3A Project: ബെംഗളൂരു: നഗരത്തിൻ്റെ വികസനത്തിന് ചുക്കാൻ പിടിച്ച് ബെംഗളൂരു മെട്രോ റെയിൽ പദ്ധതികൾ വ്യാപിപ്പിക്കുകയാണ്. അതിവേഗം വളരുന്ന നഗരത്തിലെ ട്രാഫിക് കുരുക്കിന് പരിഹാരം എന്ന രീതിയിൽ ബെംഗളൂരു മെട്രോയെ കൂടുതൽ ജനകീയമാക്കാനുള്ള ശ്രമത്തിലാണ് ബാംഗ്ലൂർ മെട്രോ റെയിൽ കോർപറേഷൻ ലിമിറ്റഡ് (ബിഎംആർസിഎൽ). ബെംഗളൂരു മെട്രോ റെയിൽ പദ്ധതിയുടെ മൂന്നാം ഘട്ടമായ നമ്മ മെട്രോ സംബന്ധിച്ച് ബിഎംആർസിഎൽ കൂടുതൽ വിവരങ്ങളാണ് ഇപ്പോൾ പുറത്തുവരുന്നത്. ബാംഗ്ലൂർ മെട്രോ റെയിൽ കോർപ്പറേഷൻ ലിമിറ്റഡ് നമ്മ മെട്രോ ഫേസ് 3എ റെഡ് ലൈൻ പദ്ധതിയുടെ ഡിപിആർ സർക്കാരിന് സമർപ്പിച്ചു. സംസ്ഥാന സർക്കാർ പച്ചക്കൊടി കാണിച്ച ഡിപിആർ കേന്ദ്ര സർക്കാരിൻ്റെ മുന്നിലേക്ക് എത്തും. ഇടനാഴിക്ക് അംഗീകാരം ലഭിച്ചാൽ ബെംഗളൂരുവിലെ ഏറ്റവും ചെലവേറിയ മെട്രോ ഇടനാഴികളിൽ ഒന്നായിരിക്കും ഇത്. ബെംഗളൂരു മെട്രോ റെയിൽ പദ്ധതിയുടെ മൂന്നാം ഘട്ടം ബെംഗളൂരു നഗരത്തിൻ്റെ ഹൃദയഭാഗത്ത് കൂടി കടന്നുപോകുമെന്ന പ്രത്യേകതയുണ്ട്. 2022 – 2023 ബജറ്റിൽ ബിജെപി സർക്കാർ പ്രഖ്യാപിച്ച പാതയാണിത്. അന്നത്തെ മുഖ്യമന്ത്രി ബസവരാജ് ബൊമ്മൈ 15,000 കോടി രൂപ ചെലവിൽ അഗ്ര, കോറമംഗല, ഡയറി സർക്കിൾ വഴി സർജാപൂർ – ഹെബ്ബാൽ (നമ്മ മെട്രോ ഫേസ് 3എ റെഡ് ലൈൻ) ഇടനാഴി പ്രഖ്യാപിച്ചിരുന്നു. 4 ഇൻ്റർചേഞ്ച് സ്റ്റേഷനുകൾ ഉൾപ്പെടെ 28 സ്റ്റേഷനുകൾ പദ്ധതിയിൽ ഉണ്ടാകും. 37 കിലോമീറ്റർ ദൂരമാണ് പദ്ധതിയുടെ ഭാഗമായുണ്ടാകുക. ഭൂമി ഏറ്റെടുക്കൽ ചെലവ് ഉൾപ്പെടെ 28,405 കോടി രൂപയാണ് ചെലവ് പ്രതീക്ഷിക്കുന്നത്. ഭൂമിവില പതിനഞ്ച് മുതൽ ഇരുപത് ശതമാനം വരെ ഉയരാനുള്ള സാധ്യതയാണ് നിലവിലുള്ളത്. പദ്ധതിയുമായി ബന്ധപ്പെട്ട പ്രവർത്തനം അതിവേഗത്തിൽ പുരോഗമിച്ചാൽ 2030 ഓടെ ആദ്യഘട്ടം പൂർത്തിയാകുമെന്നാണ് പ്രതീക്ഷിക്കുന്നത്.
