ബംഗ്ലാദേശ് പരമ്പരയ്ക്ക് മുന്നോടിയായി ഇന്ത്യയുടെ ടി20 ക്യാപ്റ്റനും(Suryakumar Yadav) ബാറ്ററുമായ സൂര്യകുമാര്‍ യാദവിന് പരിക്കേറ്റത് ആശങ്ക സൃഷ്ടിക്കുന്നു. കൂടുതല്‍ വിലയിരുത്തലിനും തുടര്‍ നടപടികള്‍ക്കുമായി ബെംഗളൂരുവിലെ ദേശീയ ക്രിക്കറ്റ് അക്കാദമിയില്‍ (എന്‍സിഎ) അദ്ദേഹം റിപ്പോര്‍ട്ട് ചെയ്തിട്ടുണ്ട്.
പരിക്ക് കാരണം സൂര്യകുമാര്‍ യാദവ് ദുലീപ് ട്രോഫി (Duleep Trophy) യുടെ ആദ്യ റൗണ്ടില്‍ ഉണ്ടാവില്ലെന്ന് ഇതോടെ ഉറപ്പായി. അടുത്തിടെ ബുച്ചി ബാബു ഇന്‍വിറ്റേഷന്‍ ടൂര്‍ണമെന്റില്‍ പങ്കെടുക്കുന്നതിനിടെ കൈക്ക് പരിക്കേല്‍ക്കുകയായിരുന്നു. കോയമ്പത്തൂരില്‍ ടിഎന്‍സിഎ ഇലവനെതിരേ മുംബൈയ്ക്ക് വേണ്ടി കളിക്കുന്നതിനിടെയാണ് പരിക്കേറ്റത്. തുടര്‍ന്ന് അവസാന ദിവസത്തെ കളിയില്‍ നിന്ന് വിട്ടുനിന്നു.
ഇന്ത്യയുടെ ടെസ്റ്റ് ടീമിലേക്ക് കൂടി തിരിച്ചെത്താന്‍ സ്‌കൈ ആഗ്രഹിക്കുന്നുണ്ട്. അതിനാലാണ് ആഭ്യന്തര ക്രിക്കറ്റില്‍ കളിക്കാന്‍ തീരുമാനിച്ചത്. ബുച്ചി ബാബു ഇന്‍വിറ്റേഷന്‍ ടൂര്‍ണമെന്റിന് പിന്നാലെ ദുലീപ് ട്രോഫിയിലും മികച്ച പ്രകടനം നടത്തി റെഡ് ബോള്‍ ഫോര്‍മാറ്റിലും തനിക്കുള്ള പ്രാഗല്‍ഭ്യം സെലക്ടര്‍മാരെ ബോധ്യപ്പെടുത്താന്‍ സ്‌കൈ ആഗ്രഹിച്ചിരുന്നു.
സെപ്റ്റംബര്‍ അഞ്ചിനാണ് ദുലീപ് ട്രോഫിയുടെ പ്രാഥമിക റൗണ്ട് ആരംഭിക്കുന്നത്. ടൂര്‍ണമെന്റില്‍ ഇന്ത്യ സി ടീമിലാണ് സ്‌കൈ ഉള്ളത്. സെപ്റ്റംബര്‍ 5-8 വരെ അനന്തപുരില്‍ ഇന്ത്യ ഡിക്കെതിരായ ആദ്യ റൗണ്ട് മത്സരത്തില്‍ നിന്ന് അദ്ദേഹം വിട്ടുനില്‍ക്കുമെന്ന് ബിസിസിഐ വൃത്തങ്ങളെ ഉദ്ധരിച്ച് പിടിഐ റിപ്പോര്‍ട്ട് ചെയ്തു.
ബംഗ്ലാദേശിനെതിരായ വരാനിരിക്കുന്ന രണ്ട് ടെസ്റ്റുകളുടെ പരമ്പരയില്‍ തിരഞ്ഞെടുക്കപ്പെടാന്‍ സ്‌കൈ ആഗ്രഹിച്ചിരുന്നു. കഴിഞ്ഞ വര്‍ഷം മുതല്‍ ടെസ്റ്റ് ടീമില്‍ ഇടമില്ല. ഗൗതം ഗംഭീര്‍ ഹെഡ് കോച്ചായ ശേഷം ടി20യില്‍ സ്ഥിരം ക്യാപ്റ്റനാണ് സ്‌കൈ. ഗംഭീറിന്റെ പിന്തുണയോടെ ടെസ്റ്റിലേക്കും വീണ്ടുമെത്താന്‍ കഴിയുമെന്നാണ് കണക്കുകൂട്ടല്‍. സെപ്തംബര്‍ 19 ന് ചെന്നൈയിലാണ് പമ്പരയിലെ ആദ്യ ടെസ്റ്റ്.
ഇന്ത്യയുടെ ടെസ്റ്റ് ടീമിലേക്ക് തിരഞ്ഞെടുക്കാന്‍ മത്സരിക്കുന്ന കളിക്കാര്‍ക്ക് ദുലീപ് ട്രോഫി പ്രധാന വേദിയായി മാറിയ ഘട്ടത്തിലാണ് ഈ തിരിച്ചടി. പ്രമുഖ സീനിയര്‍ താരങ്ങളെല്ലാം ദേശീയ സെലക്ടര്‍മാരുടെ നിര്‍ദേശപ്രകാരം ടൂര്‍ണമെന്റില്‍ കളിക്കുന്നുണ്ട്. ദുലീപ് ട്രോഫിയിലെ മറ്റൊരു ആദ്യ റൗണ്ട് മല്‍സരത്തില്‍ ഇന്ത്യ എ ബെംഗളൂരുവിലെ എം ചിന്നസ്വാമി സ്റ്റേഡിയത്തില്‍ ഇന്ത്യ ബിയെ നേരിടും.
കഴിഞ്ഞ വര്‍ഷം ഓസ്ട്രേലിയയ്ക്കെതിരായ ടെസ്റ്റ് പരമ്പരയില്‍ സ്‌കൈക്ക് ഇടംലഭിച്ചിരുന്നെങ്കിലും ഒരു തവണ മാത്രമേ അദ്ദേഹം പ്രത്യക്ഷപ്പെട്ടിട്ടുള്ളൂ. ബോര്‍ഡര്‍-ഗവാസ്‌കര്‍ പരമ്പരയുടെ ഉദ്ഘാടന മത്സരത്തില്‍ ഒരു ഇന്നിങസില്‍ 8 റണ്‍സ് മാത്രമാണ് അദ്ദേഹം നേടിയത്. പിന്നീട് ടീമില്‍ നിന്ന് വിട്ടുനില്‍ക്കുകയും ചെയ്തു.
