തമിഴക വെട്രിക്കഴകം എന്ന പാര്‍ട്ടി രൂപീകരിച്ച് വിജയ് രാഷ്ട്രീയത്തിലേക്ക് ഇറങ്ങുന്നത് ആരാധകര്‍ക്ക് ചെറിയ രീതിയിലുള്ള സങ്കടമുണ്ടാക്കുന്ന കാര്യമാണെങ്കിലും, അണ്ണന്റെ തീരുമാനത്തെ മനസ്സിറിഞ്ഞ് സ്വീകരിച്ചിരുന്ന. എച്ച് വിനോദ് സംവിധാനം ചെയ്യുന്ന തലപതി 69 ഓടുരൂടെ വിജയ് അഭിനയം നിര്‍ത്തിയാല്‍ ഇനി റിലീസ് സമയത്ത് കൊട്ടും മേളവുമായി സിനിമയെ വരവേല്‍ക്കാനും ആര്‍ത്തുല്ലസിക്കാനും സാധിക്കില്ലല്ലോ എന്ന വിഷമമുണ്ട്, എങ്കിലും രാഷ്ട്രീയത്തിലേക്കിറങ്ങുന്ന അണ്ണന് വേണ്ടി എല്ലാ പിന്തുണയും നേരുന്നു എന്നാണ് ദളപതി ഫാന്‍സ് പറഞ്ഞിട്ടുള്ളത്.
എന്നാല്‍ വിജയ് യുടെ തമിഴ് ആരാധകര്‍ ഇപ്പോള്‍ അത്ര തൃപ്തരല്ല. കേരളത്തിലും കടല്‍ പോലെ ആരാധകരുള്ള വിജയ് മലയാളികള്‍ക്ക് ഓണം ആശംസിച്ച് പോസ്റ്റ് പങ്കുവച്ചത് ഇപ്പോള്‍ തമിഴകത്ത് വലിയ ചര്‍ച്ചയാവുകയാണ്. തമിഴ് കൊല്ലപ്പിറവിയ്ക്കും, അടുത്തിടെ നടന്ന വിനായക ചദ്ദുര്‍ത്ഥിയ്ക്കും ഒന്നും ആശംസകള്‍ അറിയിച്ച് ഒരു പോസ്റ്റ് പോലും പങ്കുവയ്ക്കാത്ത വിജയ് ഓണാഘോഷത്തിന് മലയാളികളെ ആശംസിച്ചത് ഒട്ടും ശരിയായില്ല എന്ന് ആരാധകര്‍ പറയുന്നു.
പാര്‍ട്ടി പേരിനൊപ്പം തമിഴ്‌നാട് ചേര്‍ത്തിട്ട്, സ്വന്തം നാട്ടുകാര്‍ക്ക് ഒരാശംസ പോലും പറയാത്ത വിജയ് യുടെ രീതിയ്ക്ക് എതിരെ തമിഴ് ജനത വിഷമം പ്രകടിപ്പിച്ചിരുന്നു. ഈ വിഷയത്തോടുള്ള സംവിധായകന്‍ മോഹന്‍ ജിയുടെ പ്രതികരണം ആരാധകര്‍ ഏറ്റെടുത്തു. വിജയ് അണ്ണന് രാഷ്ട്രീയത്തിലേക്ക് ഇറങ്ങിയതിനെ സ്വാഗതം ചെയ്യുന്നു. പക്ഷേ അദ്ദേഹത്തിന്റെ റൂട്ട് ശരിയല്ല. വിനായക ചദ്ദുര്‍ത്ഥിയ്ക്ക് തമിഴ് ജനങ്ങള്‍ക്ക് ആശംസ അറിയിക്കാതെ ഓണാഘോഷത്തിന് ആശംസ അറിയിച്ചത് തെറ്റായി പോയി എന്ന് മോഹന്‍ ജി പറയുന്നു.
അതേ സമയം, വിനായക ചദ്ദുര്‍ത്ഥിയ്ക്ക് ആശംസിക്കാത്തതിന് കാരണം ഒരു പക്ഷേ അത് ഹൈന്ദവ ആഘോഷമായതുകൊണ്ടാവാം എന്നും മോഹന്‍ ജി പറയുന്നു. വിനായക ചദ്ദുര്‍ത്ഥിയ്ക്ക് ആശംസകള്‍ അറിയിച്ചാല്‍, അത് ഇന്ന് ഇന്ത്യ ഭരിക്കുന്ന ബിജെപിയെ പിന്തുണയ്ക്കുന്നത് പോലെയാവും. അതുകൊണ്ട് മാത്രം പലര്‍ക്കും ആശംസ അറിയിക്കാന്‍ പേടിയാണ്. മാധ്യമങ്ങള്‍ അത് പുറത്തുവിടുന്നതും ആ രീതിയില്‍ ആയിരിക്കും. വിനായക ചദ്ദുര്‍ത്ഥിയ്ക്കും ബിജെപി പാര്‍ട്ടിയ്ക്കും ഒരു ബന്ധവുമില്ല എന്ന് നിങ്ങള്‍ മാധ്യമങ്ങള്‍ മനസ്സിലാക്കിയാല്‍ അത് തീരും- എന്നാണ് മോഹന്‍ ജി പറഞ്ഞത്.
ഒരുപക്ഷേ ആ കാരണം കൊണ്ടാവാം വിജയ് വിനായക ചദ്ദുര്‍ത്ഥിയ്ക്ക് ആശംസകള്‍ അറിയ്ക്കാതെ ഓണാശംസകള്‍ അറിയിച്ചത് എന്ന ആശ്വാസത്തിലാണ് വിജയ് യുടെ തമിഴ് ഫാന്‍സ്. അപ്പോഴും എന്തുകൊണ്ട് തമിഴ് പുത്താണ്ടുനാള്‍ വാഴ്ത്തുക്കള്‍ അറിയിച്ചില്ല എന്ന പരിഭവം ബാക്കിയാണ്.
