മുതിർന്ന മറാത്തി നടൻ അതുൽ പർചുരെ (57) അന്തരിച്ചു. കാൻസർ രോഗത്തെ തുടർന്ന് തിങ്കളാഴ്ചയായിരുന്നു മരണം. മറാത്തി, ബോളിവുഡ് സിനിമകളില്‍ സാന്നിധ്യമായ താരമാണ് അതുല്‍ പർചുരെ. അതേസമയം മഹാരാഷ്ട്ര മുഖ്യമന്ത്രി ഏകനാഥ് ഷിൻഡെ അതുൽ പർചുരെയുടെ മരണത്തില്‍ ദുഃഖം രേഖപ്പെടുത്തി.
കപിൽ ശർമ്മയുടെ കോമഡി ഷോയിലെ അവിസ്മരണീയമായ പ്രകടനം ഉൾപ്പെടെ നിരവധി ഹിന്ദി ടെലിവിഷൻ ഷോകളിലും സിനിമകളിലും പ്രത്യക്ഷപ്പെട്ട അതുൽ പർചുരെ അറിയപ്പെടുന്ന മറാത്തി നടനായിരുന്നു. വർഷങ്ങളായി ക്യാൻസറുമായുള്ള പോരാട്ടത്തിലായിരുന്നു അതുൽ പർചുരെ. കപിൽ ശർമ്മ ഷോ പോലുള്ള ജനപ്രിയ ഷോകളില്‍ അതുൽ പർചുരെ സാന്നിധ്യമായിട്ടുണ്ട്. അജയ് ദേവ്ഗൺ, സഞ്ജയ് ദത്ത് എന്നിവരുടെ സിനിമ ഓൾ ദ ബെസ്റ്റിലെ അതുൽ പർചുരെയുടെ കോമഡി റോള്‍ ഏറെ ശ്രദ്ധേയമാണ്. സലാമേ ഇഷ്ക്, പാര്‍ട്ണര്‍, ഖട്ടമീട്ട, ബുഡ്ഡാ ഹോ ഗാ തേരാ ബാപ്പ് തുടങ്ങിയ ചിത്രങ്ങളിലും ഇദ്ദേഹം ശ്രദ്ധേയ വേഷങ്ങള്‍ ചെയ്തിട്ടുണ്ട്.
മുൻപ് നടന്ന ഒരു ടോക്ക് ഷോയിൽ, തൻ്റെ കാൻസർ രോഗത്തെ പറ്റി തരാം വെളിപ്പെടുത്തിയിരുന്നു. തന്റെ കരളിൽ ഏകദേശം 5 സെൻ്റീമീറ്റർ നീളമുള്ള ട്യൂമർ ഉണ്ടെന്നും അത് ക്യാൻസറാണെന്നും ഡോക്ടർ പറഞ്ഞുവെന്ന് താരം പറഞ്ഞിരുന്നു. എന്നാൽ ആദ്യം താൻ തെറ്റായ ചികിത്സയാണ് നടത്തിയത്. അത് തന്റെ ആരോഗ്യത്തെ കാര്യമായി ബാധിച്ചുവെന്നും തരാം പറഞ്ഞിരുന്നു.
