ഹമാസ് തലവൻ യഹ്യ സിൻവറിൻ്റെ വധത്തിന് പിന്നാലെ ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹുവിൻ്റെ വസതി ലക്ഷ്യംവച്ച് ഡ്രോൺ ആക്രമണം. ലെബനനിൽ നിന്ന് വിക്ഷേപിച്ച ഡ്രോണാണ് നെതന്യാഹുവിന്റെ വസതിക്ക് സമീപം പൊട്ടിത്തെറിച്ചത്. ആക്രമണം നടക്കുമ്പോൾ നെതന്യാഹുവും ഭാര്യയും ആരും തന്നെ വസതിയിൽ ഉണ്ടായിരുന്നില്ലെന്നും ആക്രമണത്തിൽ ആർക്കും പരിക്കുകൾ ഇല്ലെന്നും പ്രധാനമന്ത്രിയുടെ വക്‌താവ് അറിയിച്ചു.
ഇന്ന് രാവിലെയായിരുന്നു ഹിസ്ബുള്ളയുടെ അപ്രതീക്ഷിത ആക്രമണം. മൂന്ന് ഡ്രോണുകളാണ് ലെബനനിൽ നിന്ന് വിക്ഷേപിച്ചത് ഇതിൽ രണ്ടെണ്ണം ഇസ്രയേൽ വ്യോമസേന തകർത്തു. മൂന്നാമത്തേതാണ് നെതന്യാഹുവിന്റെ വസതിക്ക് സമീപം കെട്ടിടത്തിൽ പതിച്ച് സ്ഫോടനമുണ്ടായത്. ഡ്രോൺ ആക്രമണത്തിൽ കെട്ടിടത്തിൻ്റെ ഒരു ഭാഗം തകർന്നു.
ലെബനനിൽ നിന്ന് 70 കിലോമീറ്റർ അകലെയുള്ള സീസേറിയയിലാണ് നെതന്യാഹുവിൻ്റെ വസതി. ഇസ്രയേലിനെതിരെയുള്ള ആക്രമണം കൂടുതൽ ശക്തമാക്കിയെന്നും സിൻവറിൻ്റെ മരണത്തോടെ യുദ്ധം അടുത്ത ഘട്ടത്തിലേക്കു പ്രവേശിച്ചെന്നും ഹിസ്ബുല്ല പ്രസ്‌താവനയിറക്കിയിരുന്നു. എന്നാൽ ബന്ദികളെ വിട്ടുകിട്ടണമെന്ന ആവശ്യത്തിനു തടസം നിന്നയാളാണ് യഹ്യ സിൻവറെന്നും ഹമാസ് ആയുധം താഴെവയ്ക്കുകയും ബന്ദികളെ മോചിപ്പിക്കുകയും ചെയ്താൽ നാളെത്തന്നെ യുദ്ധം അവസാനിപ്പിക്കുമെന്നും ഗാസയെ അഭിസംബോധന ചെയ്‌ത നെതന്യാഹു പറഞ്ഞിരുന്നു.
