ബാംഗ്ലൂരിലെ എം ചിന്നസ്വാമി സ്റ്റേഡിയത്തിൽ ന്യൂസിലൻഡിനോട് ടീം എട്ട് വിക്കറ്റിന് തോറ്റതിന് പിന്നാലെ മുഹമ്മദ് ഷമി ടീം ഇന്ത്യയുടെ അസിസ്റ്റൻ്റ് കോച്ച് അഭിഷേക് നായരുമായി ചേർന്ന് ബോളിങ് പരിശീലനം നടത്തിയിരിക്കുന്നു. 2023ൽ സ്വന്തം തട്ടകത്തിൽ നടന്ന ഏകദിന ലോകകപ്പ് ഫൈനൽ മുതൽ ഷമി കളിക്കളത്തിന് പുറത്തായിരുന്നു.
ഇടത് കാൽമുട്ടിൽ സ്‌ട്രാപ്പിംഗുമായി ഷമി ഒരു മണിക്കൂറോളം പന്തെറിഞ്ഞു. മുൻ ഇന്ത്യൻ താരം നായർ ഷമിക്കെതിരെ ബാറ്റ് ചെയ്യുന്നത് കാണുമ്പോൾ ബൗളിംഗ് കോച്ച് മോർണി മോർക്കൽ സ്പീഡ്സ്റ്ററിനെ സൂക്ഷ്മമായി നിരീക്ഷിച്ചു. “ക്രിക്കറ്റ് ഫീൽഡിലേക്ക് തിരിച്ചുവരാൻ ഞാൻ കഠിനമായി പരിശ്രമിക്കുകയാണ്. എന്നിരുന്നാലും, ഞാൻ പൂർണ്ണ ഫിറ്റ്നസ് വീണ്ടെടുക്കുന്നതുവരെ ഗെയിം കളിക്കുന്നതിൽ അർത്ഥമില്ല. റിസ്‌ക്കെടുക്കാൻ ഞാൻ ആഗ്രഹിക്കുന്നില്ല. ”മുഹമ്മദ് ഷമി സെപ്റ്റംബറിൽ പിടിഐയോട് പറഞ്ഞു.
“ഞാൻ എത്ര ശക്തനായി മടങ്ങിവരുന്നുവോ അതാണ് എനിക്ക് നല്ലത്. ബംഗ്ലാദേശ്, ന്യൂസിലൻഡ്, ഓസ്‌ട്രേലിയ എന്നിവയ്‌ക്കെതിരായ മത്സരങ്ങൾക്കായി ഞാൻ തിരക്കുകൂട്ടുന്നില്ല. 100 ശതമാനം ഫിറ്റാകുന്നതുവരെ ഞാൻ മത്സരങ്ങൾ ഒന്നും കളിക്കില്ല.” ഷമി പറഞ്ഞു.
ബംഗാളിനായി നടന്നുകൊണ്ടിരിക്കുന്ന രഞ്ജി ട്രോഫി മത്സരങ്ങൾ അദ്ദേഹം കളിക്കുമെന്ന് പ്രതീക്ഷിച്ചിരുന്നു, എന്നാൽ ഇടത് കാൽമുട്ടിലെ വീക്കം അദ്ദേഹത്തിൻ്റെ മടങ്ങിവരവ് വൈകിപ്പിച്ചു. ക്യാപ്റ്റൻ രോഹിത് ശർമ്മ തനിക്ക് ഷാമിയെ വെച്ചിട്ട് റിസ്ക്ക് എടുക്കാൻ താത്പര്യമില്ല എന്ന് പറഞ്ഞിരുന്നു. എന്തായാലും ഷമി പരിശീലനം ആരംഭിച്ചത് ഇന്ത്യക്ക് നൽകുന്നത് പോസിറ്റീവ് വാർത്തയാണ്.
