വന്‍ പ്രേക്ഷകപ്രീതിയാണ് ‘1000 ബേബീസ്’ എന്ന സീരിസിന് ലഭിച്ചു കൊണ്ടിരിക്കുന്നത്. ഈ വര്‍ഷം എത്തിയ ത്രില്ലര്‍ സീരിസുകളിലും സിനിമകളിലും വച്ചേറ്റവും മികച്ച ക്രൈം ത്രില്ലറുകളില്‍ ഒന്നാണ് 1000 ബേബീസ്. സീരിസില്‍ ഏറെ ശ്രദ്ധ നേടിയ കഥാപാത്രങ്ങളില്‍ ഒന്നാണ് സഞ്ജു ശിവറാമിന്റെത്. സീരിസില്‍ ഒരു നഗ്നരംഗത്തില്‍ അടക്കം സഞ്ജു അഭിനയിച്ചിട്ടുണ്ട്.
ഈ സീന്‍ സോഷ്യല്‍ മീഡിയയില്‍ പ്രചരിച്ചതിനെ കുറിച്ചാണ് സഞ്ജു സംസാരിച്ചിരിക്കുന്നത്. ആ ഒരു സീനിനെ കുറിച്ച് തുടക്കത്തില്‍ എന്നോട് പറഞ്ഞിരുന്നില്ല. ആ ഷോട്ട് എടുക്കുന്നതിന് രണ്ട് മിനിറ്റ് മുമ്പാണ് പറഞ്ഞത്. ബിബിന്‍ എന്ന കഥാപാത്രം ഒന്നിലും എക്‌സ്‌പോസ്ഡല്ല. അമ്മയല്ലാതെ വേറൊന്നും അയാള്‍ക്കില്ല.
അതുകൊണ്ട് തന്നെ അങ്ങനൊരു ന്യൂഡ് സീന്‍ എടുക്കുമ്പോള്‍ നമുക്ക് ഒരുപാട് കാര്യങ്ങള്‍ പറയാതെ പറയാം. മഹാ വൃത്തികെട്ട ഒരു ബാത്ത്‌റൂമിലായിരുന്നു ഷൂട്ട്. പിന്നെ ആ സീനുകള്‍ ഷൂട്ട് ചെയ്തത് ഒരു പഴയ വീട്ടിലാണ്. ആ വീട് അങ്ങനെ തന്നെയാണ്. അല്ലാതെ ആര്‍ട്ട് വര്‍ക്ക് ചെയ്ത് എടുത്തതല്ല. പിന്നെ അത്തരം സീനുകളുടെ ആവശ്യകത ഉണ്ടാകുമ്പോള്‍ ചെയ്യാന്‍ നമ്മള്‍ ബാധ്യസ്ഥരാണ്.
ന്യൂഡായി അഭിനയിച്ച ശേഷം വേറെ കുറേ പ്രശ്‌നങ്ങള്‍ എനിക്ക് നേരിടേണ്ടി വരുന്നുണ്ട്. കാരണം അത്തരത്തിലുള്ള മെസേജുകള്‍ വരും. ട്രെയിലറില്‍ ഒരു മിന്നായം പോലെ ആ സീനുണ്ട്. എന്റെ ന്യൂഡ് സീന്‍ ട്രെയ്‌ലറില്‍ ഉള്‍പ്പെടുത്തിയിട്ടുണ്ടെന്ന് എനിക്ക് അറിയില്ലായിരുന്നു. ഒരു ദിവസം ഏതോ ഒരു ട്രോള്‍ പേജില്‍ ആ സീന്‍ വന്നു. അതുകണ്ട് ഞാന്‍ ഞെട്ടി.
ഇത് എവിടുന്ന് വന്നുവെന്ന് ഞാന്‍ ചിന്തിച്ചു. ഇനി സംവിധായകന്‍ നജീംക്ക ലീക്ക് ചെയ്തതാണോയെന്ന് വരെ ചിന്തിച്ചു. പിന്നീട് അദ്ദേഹത്തെ വിളിച്ച് ചോദിച്ചപ്പോഴാണ് ആ ഷോട്ട് ട്രെയ്‌ലറിലുണ്ടെന്ന് ഞാന്‍ അറിഞ്ഞത്. അത് വൈറലായ ശേഷം പലരും ചോദിക്കാന്‍ തുടങ്ങി ഇത്രയേ ഉള്ളോ, ഇനിയുമുണ്ടോ എന്നൊക്കെ.
ഇങ്ങനെയുള്ള കുറച്ച് പ്രശ്‌നങ്ങള്‍ ഫെയ്‌സ് ചെയ്യണം. അപ്പോഴാണ് എനിക്ക് ഇതൊരു വലിയ പ്രശ്‌നമാണെന്ന് മനസിലായത്. അതോടെ മനസിലായി സ്ത്രീകള്‍ ഫേസ് ചെയ്യുന്നത് ചില്ലറക്കാര്യങ്ങള്‍ ആയിരിക്കില്ലെന്ന്. പലരും ആ സീന്‍ സ്‌ക്രീന്‍ ഷോട്ട് എടുത്ത് ടാഗും ചെയ്യുന്നുണ്ട് എന്നാണ് സഞ്ജു പറയുന്നത്.
