മുൻ ഭാര്യ നൽകിയ പരാതിയിൽ ഹൈക്കോടതിയെ സമീപിക്കാനൊരുങ്ങി അറസ്റ്റിലായ നടൻ ബാല. കേസ് റദ്ദാക്കണമെന്ന് ആവശ്യപ്പെട്ടാണ് ബാല ഹൈക്കോടതിയെ സമീപിക്കാൻ ഒരുങ്ങുന്നത്. ബാലയുടെ അഭിഭാഷക ഫാത്തിമ സിദ്ദിഖാണ് ഇതുസംബന്ധിച്ച വിവരം അറിയിച്ചത്.
ബാലയെ അറസ്റ്റ് ചെയ്യുന്നത് ഒഴിവാക്കാമായിരുന്നെന്ന് അഭിഭാഷക ഫാത്തിമ സിദ്ദിഖ് പറഞ്ഞു. പൊലീസുമായി സഹകരിക്കുന്ന ആളാണ് ബാല. ചോദ്യം ചെയ്യാൻ വിളിപ്പിച്ചിരുന്നെങ്കിൽ ബാല സഹകരിക്കുമായിരുന്നു. ഇപ്പോഴത്തെ അറസ്റ്റ് ഒഴിവാക്കാമായിരുന്നെന്നും കേസ് റദ്ദാക്കുന്നതിന് വേണ്ടി ഹൈക്കോടതിയെ സമീപിക്കാൻ ഒരുങ്ങുകയാണ് ബാലയെന്നും ഫാത്തിമ സിദ്ദിഖ് പറഞ്ഞു.
ഇന്ന് പുലർച്ചെയാണ് മുൻ ഭാര്യ നൽകിയ പരാതിയിൽ ബാലയും മാനേജർ രാജേഷും അറസ്റ്റിലായത്. ഇരുവരും ഇപ്പോൾ പൊലീസ് സ്‌റ്റേഷനിൽ തുടരുകയാണ്. വൈകിട്ടോടെ കോടതിയിൽ ഹാജരാക്കിയേക്കും. ബാലയും മുൻഭാര്യയും തമ്മിലുള്ള പ്രശ്നങ്ങൾ അടുത്ത കാലത്തായി സോഷ്യൽ മീഡിയയിൽ ചർച്ചയായിരുന്നു.
