ഓസ്‌ട്രേലിയയ്‌ക്കെതിരായ അഞ്ച് മത്സരങ്ങളുടെ ടെസ്റ്റ് പരമ്പരയിലെ ഇന്ത്യയുടെ പ്രകടനം വിലയിരുത്തുന്നതിനായി ഇന്ത്യൻ ക്രിക്കറ്റ് കൺട്രോൾ ബോർഡ് (ബിസിസിഐ) ജനുവരി 11 ന് മുംബൈയിൽ ഒരു അവലോകന യോഗം നടത്തി. ഇന്ത്യൻ എക്‌സ്‌പ്രസിൻ്റെ റിപ്പോർട്ട് പ്രകാരം താരങ്ങളുടെ പ്രകടനത്തിന്റെ അടിസ്ഥാനത്തിൽ വേരിയബിൾ പേ സിസ്റ്റം അവതരിപ്പിക്കുന്ന കാര്യം ബിസിസിഐ പരിഗണിക്കുന്നുണ്ട്.
2024-25 ലെ ബോർഡർ-ഗവാസ്‌കർ ട്രോഫിയിൽ (ബിജിടി) ഓസ്‌ട്രേലിയയ്‌ക്കെതിരെ ടീം ഇന്ത്യ 1-3 ടെസ്റ്റ് പരമ്പര പരാജയം ഏറ്റുവാങ്ങിരുന്നു. 2014-15 ന് ശേഷം ഓസ്‌ട്രേലിയയ്‌ക്കെതിരെ ഇന്ത്യയുടെ ആദ്യ ടെസ്റ്റ് പരമ്പര തോൽവിയാണിത്. ജൂണിൽ നടക്കാനിരിക്കുന്ന ഐസിസി വേൾഡ് ടെസ്റ്റ് ചാമ്പ്യൻഷിപ്പ് (ഡബ്ല്യുടിസി) ഫൈനലിൽ എത്താനുള്ള സാധ്യത പട്ടികയിൽ മുന്നിൽ ഉണ്ടായിരുന്ന ഇന്ത്യക്ക് ഈ തോൽവി അപ്രതീക്ഷിത തിരിച്ചടിയാണ് സമ്മാനിച്ചത്.
ക്യാപ്റ്റൻ രോഹിത് ശർമ, മുഖ്യ പരിശീലകൻ ഗൗതം ഗംഭീർ, ചീഫ് സെലക്ടർ അജിത് അഗാർക്കർ എന്നിവർ അവലോകന യോഗത്തിൽ പങ്കെടുത്തു. ചർച്ചകൾക്കിടയിൽ, കളിക്കാർക്ക് പ്രകടനത്തെ അടിസ്ഥാനമാക്കിയുള്ള വേരിയബിൾ ഘടന അവതരിപ്പിക്കാനുള്ള നിർദ്ദേശം അവതരിപ്പിച്ചു. ഈ സമ്പ്രദായം കളിക്കാരെ അവരുടെ പ്രകടനങ്ങൾ നടത്താൻ കൂടുതൽ ഉത്തരവാദിത്തമുള്ളവരാക്കി മാറ്റും. ജീവനക്കാരുടെ പ്രകടനം വിലയിരുത്തുന്ന കോർപ്പറേറ്റ് മൂല്യനിർണ്ണയ സംവിധാനങ്ങളിൽ നിന്നാണ് ഈ ആശയം പ്രചോദനം ഉൾക്കൊണ്ടിരിക്കുന്നത്. സ്ഥിരതയുള്ളതും ഉയർന്ന നിലവാരമുള്ളതുമായ പ്രകടനങ്ങൾ പ്രോത്സാഹിപ്പിക്കുക എന്നതാണ് ഈ നീക്കത്തിൻ്റെ ലക്ഷ്യം.
“കളിക്കാർക്ക് ഉത്തരവാദിത്തം ഉണ്ടായിരിക്കണം, അവരുടെ പ്രകടനം പ്രതീക്ഷകൾക്ക് അനുസൃതമല്ലെന്ന് കരുതുകയാണെങ്കിൽ, വേരിയബിൾ ശമ്പളം വെട്ടിക്കുറയ്ക്കണം,” ഇന്ത്യൻ എക്സ്പ്രസ് റിപ്പോർട്ടിൽ പറഞ്ഞു.
