ഉപതിരഞ്ഞെടുപ്പ് നടക്കുന്ന പാലക്കാട്ട് കോണ്‍ഗ്രസ് നേതാക്കള്‍ താമസിക്കുന്ന ഹോട്ടല്‍മുറികളില്‍ പോലീസിന്റെ പരിശോധനയെ തുടര്‍ന്ന് മണിക്കൂറുകള്‍ നീണ്ട സംഘര്‍ഷം.തെരഞ്ഞെടുപ്പിനായി അനധികൃത പണം എത്തിച്ചെന്ന പരാതിയിലാണ് ഇന്നലെ അര്‍ധരാത്രി പോലീസ് സംഘം ഹോട്ടലില്‍ പരിശോധനയ്ക്കെത്തിയത്.
പോലീസ് പരിശോധനയ്ക്കിടെ സിപിഎം, ബിജെപി നേതാക്കളും പ്രവര്‍ത്തകരും സ്ഥലത്തെത്തിയതോടെ സ്ഥലത്ത് സംഘര്‍ഷാവസ്ഥയുണ്ടായി. ഹോട്ടലില്‍ പണം എത്തിച്ചത് കോണ്‍ഗ്രസ് ആണെന്ന് ഡിവൈഎഫ്ഐ ആരോപിക്കുന്നു. ഷാഫി പറമ്പിലും വി.കെ. ശ്രീകണ്ഠനും ഹോട്ടലില്‍ എത്തി. എഎ റഹിം എംപിയും പിഎം ആര്‍ഷോയും സ്ഥലത്ത് എത്തിയിട്ടുണ്ട്.
അനധികൃത പണം എത്തിച്ചതായി പരാതി ലഭിച്ചതിനെത്തുടര്‍ന്നാണ് പോലീസ് സംഘം അര്‍ധരാത്രി 12ഓടെ പരിശോധനയ്ക്കെത്തിയതെന്നാണ് വിവരം. ഇതിനിടെ, കോണ്‍ഗ്രസ്, സിപിഎം, ബിജെപി പ്രവര്‍ത്തകര്‍ തമ്മില്‍ ഹോട്ടലിനുള്ളില്‍ ഉന്തുംതള്ളും വാക്കേറ്റവുമുണ്ടായി.
