യുവധാര യൂത്ത് ലിറ്ററേച്ചര് ഫെസ്റ്റിവല് (വൈഎല്എഫ്) രണ്ടാംപതിപ്പ് ഒമ്പതുമുതല് 12 വരെ ഫോര്ട്ട് കൊച്ചിയില് നടക്കും. ഏറ്റവും പുതിയ കാലത്തെ അഭിസംബോധന ചെയ്ത് ‘ജെന്–സി കാലവും ലോകവും’ എന്ന ആശയവുമായാണ് ഈ വര്ഷം വൈഎല്എഫ് സംഘടിപ്പിക്കുന്നതെന്ന് ഫെസ്റ്റിവല് ഡയറക്ടര് ബെന്യാമിന് പറഞ്ഞു.
ഒമ്പതിന് വൈകിട്ട് അഞ്ചിന് ജ്ഞാനപീഠ ജേതാവ് ദാമോദര് മോസോ ഫെസ്റ്റിവല് ഉദ്ഘാടനം ചെയ്യും.കനിമൊഴി എംപി മുഖ്യാതിഥിയാകും. എം മുകുന്ദന്, വിവേക് ഷാന്ബാഗ്, എന് എസ് മാധവന് എന്നിവരും ഉദ്ഘാടന സമ്മേളനത്തില് പങ്കെടുക്കും. മലയാളത്തിന്റെ അനശ്വര സാഹിത്യകാരന് എം ടി വാസുദേവന്നായര്ക്ക് ആദരമായി അദ്ദേഹത്തിന്റെ സാഹിത്യസൃഷ്ടികളുടെ പേരുകളാണ് ലിറ്ററേച്ചര് ഫെസ്റ്റിവലിന്റെ നാലുവേദികള്ക്കും നല്കിയിരിക്കുന്നത്. വേദി 1- കടവ്, 2- കാലം, 3- മഞ്ഞ്, 4- നിര്മാല്യം.
എണ്പത് സെഷനുകളിലായി കല, സാഹിത്യ, സാംസ്കാരിക, രാഷ്ട്രീയ രംഗങ്ങളിലെ ശ്രദ്ധേയരായ വ്യക്തികള് ഫെസ്റ്റിവലിന്റെ ഭാഗമാകും. പി സായ്നാഥ്, ബെ സ്വദ വില്സണ്, മുഹമ്മദ് യൂസഫ് തരിഗാമി, ജീത്ത് തയ്യില്, ജെറി പിന്റോ, മഹമൂദ് കൂരിയ, മനു എസ് പിള്ള, സു വെങ്കിടേശന് തുടങ്ങി 250ല് അധികം അതിഥികള് പങ്കെടുക്കും. എല്ലാ ദിവസവും വൈകിട്ട് ആറിന് കലാപരിപാടികള് അരങ്ങേറും.
