മുൻ ഇന്ത്യൻ ക്രിക്കറ്റ് താരം സഞ്ജയ് മഞ്ജരേക്കർ, വെറ്ററൻ ബാറ്റർ വിരാട് കോഹ്‌ലി സഹതാരം ചേതേശ്വര് പൂജാരയിൽ നിന്ന് പ്രചോദനം ഉൾക്കൊണ്ട് ഇന്ത്യയുടെ ഇംഗ്ലണ്ട് പര്യടനത്തിന് മുമ്പ് കൗണ്ടി ക്രിക്കറ്റ് കളിക്കുന്നത് പരിഗണിക്കണമെന്ന് നിർദ്ദേശിച്ചു. 2024-25 ഓസ്‌ട്രേലിയയിൽ നടന്ന ബോർഡർ-ഗവാസ്‌കർ ട്രോഫിയിൽ (ബിജിടി) കോഹ്‌ലിയുടെ നിരാശാജനകമായ പ്രകടനത്തിന് ശേഷമാണ് ഈ ഉപദേശം.
പെർത്തിലെ ആദ്യ ടെസ്റ്റിൽ അപരാജിത സെഞ്ചുറിയോടെയാണ് 36-കാരൻ പരമ്പര ആരംഭിച്ചതെങ്കിലും, തുടർന്നുള്ള നാല് മത്സരങ്ങളിൽ പൊരുതി, ഒമ്പത് ഇന്നിംഗ്‌സുകളിലായി 23.75 എന്ന മോശം ശരാശരിയിൽ 190 റൺസ് മാത്രമാണ് അദ്ദേഹം നേടിയത്.ഓഫ് സ്റ്റമ്പിന് പുറത്തുള്ള ഡെലിവറുകളിൽ കോഹ്‌ലിയുടെ ആവർത്തിച്ചുള്ള പുറത്താക്കലുകളാണ് താരം നേരിടുന്ന പ്രധാന പ്രശ്നം. ഇത് പരിഹരിക്കാൻ കോഹ്‌ലി അദ്ധ്വാനം കാര്യമായിട്ട് ഒന്നും തന്നെ നടത്തിയിട്ടില്ല.
സ്റ്റാർ സ്‌പോർട്‌സിൻ്റെ ഡീപ് പോയിൻ്റ് പോഡ്‌കാസ്റ്റിലെ ഒരു സംഭാഷണത്തിൽ, മഞ്ജരേക്കർ ഇങ്ങനെ പറഞ്ഞു:
“കോഹ്‌ലി ഒരുപാട് റെഡ് ബോൾ ക്രിക്കറ്റ് കളിക്കേണ്ടതുണ്ട്. ഇംഗ്ലണ്ടിലെ ആദ്യ ടെസ്റ്റ് ജൂണിലും കൗണ്ടി ചാമ്പ്യൻഷിപ്പ് ഏപ്രിലിലും ആരംഭിക്കും. പൂജാര ചെയ്തതുപോലെ ഒരു കൗണ്ടി ടീമിൽ ചേരാനും വിലപ്പെട്ട മാച്ച് പ്രാക്ടീസ് നേടാനും അദ്ദേഹത്തിന് കഴിയും.”
“കൗണ്ടി മത്സരങ്ങളിലെ അദ്ദേഹത്തിൻ്റെ പ്രകടനങ്ങൾ ഇന്ത്യക്ക് വിലയിരുത്താം. പോസിറ്റീവ് സൂചനകൾ ഉണ്ടെങ്കിൽ, അദ്ദേഹത്തിന് തുടരാം. അല്ലാത്തപക്ഷം കോഹ്‌ലി മാറി നിൽക്കണം. വേറെ താരങ്ങൾ പകരം വരണം ”അദ്ദേഹം കൂട്ടിച്ചേർത്തു.
അതേസമയം, ജനുവരി 23 ന് രാജ്‌കോട്ടിൽ സൗരാഷ്ട്രയ്‌ക്കെതിരായ വരാനിരിക്കുന്ന രഞ്ജി ട്രോഫി മത്സരത്തിനുള്ള ഡൽഹിയുടെ താൽക്കാലിക ടീമിൽ കോഹ്‌ലിയെ ഉൾപ്പെടുത്തിയിട്ടുണ്ട്. എന്നിരുന്നാലും, സമീപകാല റിപ്പോർട്ടുകൾ പ്രകാരം, കഴുത്ത് വേദന കാരണം സ്റ്റാർ ബാറ്റർ രഞ്ജി കളിക്കാൻ സാധ്യത ഇല്ല.
